Sweden chhim lam thingtlang khaw pakhatah mi pakhatin mi a pawng vihnaah pariat laiin hliam an tuar a, an zinga pathum chu an na hle a. Police chuan he thil thleng hi firfiaka chetna a nih a rinawm thu an sawi.
A vittu hi kum 20 chuang awrh chauh niin Vetlanda khaw lailia hmun ngaah, an ram sanaa Nilaini tlai dar 3:00 (India-a zan dar 7:30) velah a che.
Mi a beih hnu lawkah hian police-in an kap a, hliam tuar chungin an kawl mek.
Prime Minister Stefan Löfven chuan tharum thawhna rapthlak tak a nih thu leh he thil thleng hian an ram himna a derthawnzia a tilang niin a sawi.
A chetna lai velah hian police officer thahnem tak tirh luh belh nghal an ni.
Mi pawng vihtu chetna hmun nga hi metre 100 chuang chuanga inhlat a ni hlawm tih tual chhung police chief Jonas Lindell chuan a sawi.
Mi vih nan hian eng ang hmanrua nge hman a nih tih sawi chian a la awm lo.
Hnuchhuitute chuan a tirah chuan he thil thleng hi mi thah tumna pangngai niin an sawi a; mahse, a hnuah firfiak chetna anga ngaiin Swedish security police-te nen an bawhzui nghal mek.
Police chief chuan a titu nia an hriat hi helai vela cheng, tun hma lam pawha thubuai tenau lo nei fo tawh a nih thu a sawi niin AFP news agency chuan a tar lang.