Aizawl: HIV leh a kaihhnawih natna inkaichhawn theih chi hrang hrang, tan in leh khuahkhirh ngai enkawlna hmun hrang hranga hmalakna tur Integrated STI, HIV, TB & Hepatitis (ISHTH) Campaign kalpui tur a inbuatsaihna atan nimin khan I&PR Conference Hall, Project Veng, Kolasibah mawhphurna hrang hrang inhrilhhriatna hun neih a ni a. John LT Sanga, Deputy Commissioner chuan ‘Orientation for ISHTH Campaign’ a kalkawmte lawmna thu sawiin Dr. RK Lalthlamuana, SMO chuan Campaign kalpui dan tur tlangpui tarlanna hun a hmang bawk a ni.
Deputy Commissioner John LT Sanga chuan HIV hrik kai hmuhchhuah tamna District kan nih angin he hrik darh zel tur venna leh he hrik kaihhnawih natna dang dap chhuah leh enkawl tur a ISHTH Campaign kalpui a ni tur chu lawmawm a tih thu a sawi a. Zirchianna thenkhata a lan danin, mihring, a huhoa enkawlna hmun, District Jail leh De-Addiction Centre-ah te chuan heng hri inkaidarhna hi a hluar bik tih hmuhchhuah a nih angin Kolasib district chhung a heng hmunahte hian Campaign neih a nih tur thu a sawi. John LT Sanga chuan Kolasib chu State thenawmte nen ramri intawm a nih angin natna inkaichhawn theih hrang hrang veite dap chhuah leh enkawlna pe tur a hmalakna chuan ram pum hriselna thui tak a tha zawngin a nghawng ngei a beisei thu a sawi.
Dr. RK Lalthlamuana, Senoir Medical Officer tarlan danin ISHTH Campaign chhung hian District Jail, Jordan Home, Sethawn, Golgotha Home, Vairengte, TNT, Khuangpuilam, Swadhar Greh, Kolasib leh Vairengtea enkawl mek mi 350 vel hriselna endik a ni ang.