Eptu party thenkhatin sorkar sikula zirlaiten a thlawna an dawn tur lehkhabu an la dawng mumal tia an sawi chu education department hotute pawhin kum dang aiin an sem muang tih chu an pha lo a, la sem kim lohte erawh an sem zo tep tawh tih an sawi.
The Zozam Times zawhna chhangin school education department hotute chuan kumina academic session thara zirlaibu sem chhuah a muan chhan chu zirlaibu chhu tura an tihfel hmasak zawkte an inhnuhdawh leh tak vang a nih thu an sawi.
Education department hotute sawi danin zirlaibu chhu tur hian Dehradun-a printing press pakhat chu nikum September thla khan an be fel a, an duh dan anga sorkarin a leisak theih loh avangin December thlaah an inhnukdawk leh a, chumi hnu kumin kum tir lamah Aizawla printing press pakhat chu chhurtir a ni leh ta a ni.
Aizawla printing press pakhat chuan kumin kum tirah zirlaibu an chhu tan a, kum danga an chhut tan thin aiin an tlai bakah printing press hian lehkha phek lei kawngah harsatna an tawk leh ta bawk nen zirlaibu chhut hi a chak thei ta lo va. Chuti chung chuan chhut zawh apiang chu district hrang hrangah thawn chhuah nghal zel a ni a, hun reilo teah lehkhabu hi an sem zawh theih mai an beisei.
Hetihlai hian AAP Mizoram chuan sorkar sikul hrang hranga zirlaibu la dawng kim lote chu rang taka pe turin sorkar an phut.
Nimin khan Aizawl Press Club-ah chanchinbu mite an kawm a, April 5-ah sikul luh tan atanga thla hnih a ral hnuah pawh zirlaiten zirlaibu an la dawng kim lo chu mak an tih thu leh hei hi a chhan chu sorkarin a tih tur a tih that tawk loh vangah an puh a, July thlaa first term exam neih a nih tawh dawn laia zirlaibu dawng kim lo an la awm teuh chu pawi an tih thu an sawi a, tunah hian class 7 zirlaibu – Science, Mathematics leh Hindi te chu chhut mek a nih thu an sawi a ni.
Tar lan tawh thin angin, zirlabu sem chungchangah hian AAP hian thawm an lo nei fo tawh a, MZP pawhin zirlaibu hi sem chhuak kim vat turin sorkar an lo phut a, Congress thalaite pawhin kar kalta khan zirlaibu sem a mumal lo chhan hi education minister an lo zawt tawh bawk a ni.