French Open mipa inelna lama seeded number six Holger Rune chuan set nga inkhel hmuhnawm takah Francisco Cerundolo a hneh a. French Open quarter-final a lut.
Kum 20 mi Rune hian inkhelh laiin luhai a nei a, tihsual vawi 73 lai nei bawkin darkar li chhungin a chak thei hram.
Court Suzanne Lenglen-ah hian umpire pawhin tihsual neiin hei hi Rune hian chak nan a chhawr tangkai a. Danish player beiseiawm hian 7-6 (7-3) 3-6 6-4 1-6 7-6 (10-7) in hnehna a chang.
Inkhel dangah 2022 Roland Garros runner-up Casper Ruud chuan Nicolas Jarry 7-6 (7-3) 7-5 7-5 in a hneh a. Rune nen hian an inkhel leh ang.
Alexander Zverev-a’n a comeback kawng chhunzawmin Grigor Dimitrov 6-1 6-4 6-3 in a hneh a. Kum 26 mi hian a vawikhatna a Grand Slam quarter-final khel tur world number 49 Tomas Martin Etcheverry a hmachhawn leh ang.