Chief Minister Zoramthanga’n ram changkang leh upa tak tak, kum za tel hmasawnna lo kalpui tawhnate anga Mizoram siam ve tur chuan kum hnih khat chauh a tawk lo tih nimina Hnahthial a tlawhnaah a sawi.
Chief minister chuan nimin khan lehlangin Hnahthial a tlawh a, a puala Hnahthial PWD IB-a inkhawm tawi neihah thu sawiin Mizoram hmasawntir turin hma thlir thui tak neih a ngai a, thahnemngai taka beihin ram entawn tlakah a siam theih tih a sawi a, “Chu hmathlir tihlawhtling tur chuan tunah pawh theitawp chhuaha hma lak zel a ni,” a ti.
Ram hmasawnna atana ram neitute chu a enkawltu an nih a pawimawh a, hnam thinlung put chu ramin a mamawh tih sawiin, ram mipuiten ram hmangaihna nena thawh ho zel a pawimawh tih a sawi.
Zorama chuan Hnahthial khawpui chu district headquarter entawntlak taka siam tum a nih thu a sawi a, district thar puan a nih hnuah sorkar chuan DC office dinna tur district thar pathum tan Rs. vaibelchhe 10 theuh sum dah a nih thu leh theihtawpa harsatna hrang hrang kara hma lak a nih zel thu a sawi a ni.
Chief minister hian PWD Complex-a circuit house sakna tur tlawhin PWD engineer leh architect-te nen hnathawh dan turte an sawi ho a, hemi hnuah Deputy Commissioner Office Complex sak hna thawh mek tlawh leh bawkin DC office-a thawktute nen inkawmna hun a hmang bawk a ni.