AZL: Forest Minister TJ Lalnuntluanga’n nimin khan Tamdil Wetland Interpretation Centre & Herbarium a hawng.
Hawnna inkhawmah thu sawiin minister Manuna chuan Mizoramin a beisei leh a hriat ngai loh hmasawnna thar a hmu zel a, hmasawnna hi a thleng mek a, a thleng zel dawn tih a sawi a, “Chuvangin, beidawnna tur a awm lo a. Kan hruaitu hmasa leh thawktu hmasate hnathawh a fakawm tak zet a, theihtawp chhuaha an lo beihna sawi hmaih a thiang lo,” a ti.
Forest minister chuan Pathian thil siam duat taka enkawl chu Forest department nen a inhmeh hle a, Pathian thilsiam humhalh hi mihringte mawhphurhna a nih thu a sawi bawk.
Tamdil Wetland Interpretation Centre & Herbarium hi Mizorama din hmasak ber leh awmchhun a ni a. Hetianga lama tui mi leh zirlaite tan a tangkai hle tura ngaih a ni.
Forest minister hian thing tiak chi hrang hrang tihpunna leh enkawlna, Central Nursery, Tuirialah a hawng bawk a ni.