Aizawl: Sports Minister Robert Romawia Royte chuan nimin khan a bial, Aizawl East II huam chhunga HSLC leh HSSLC exama hlawhtlinna changte lawmpuina chu Dawrpui Multipurpose Hall-ah a buatsaih.
Zirlai hlawhtlinna changte pual hun hmannaah hian sports minister chuan thu sawiin, hlawhtlinna chang zirlaite chhuanawm a tih thu leh hlawhtlinna chang zo ta lo te pawh beidawng mai lo va nasa zawka zir zel turin a chah a. Zirlaite hi hnam rohlu, Zoram nghahfak, nakina Mizoram kaihhruaitu tur te an ni tih sawiin kawng engkimah fimkhur tur leh taima taka an zirlaite zir zel turin a fuih a ni.
Nimina hun an hmannaah hian khualzahawm education director Lalsangliana’n thu a sawi bawk a, HSLC leh HSSLC-a top ten te hnenah Laptop hlan an ni a, Subject topper hnenah smart phone, Distinction a pass te hnenah pawisa fai cheng 5000 leh hlawhtlinna chang zawng zawng te hnenah lawmpuina thilpek tha tak hlan a ni.
He huna an tar lan danin, Aizawl East II MLA hian MLA fund 2019-2023 atangin zirna kaihhnawih – HSLC & HSSLC pass lawmpuina, zirna in thawmthatna leh tihchangtlunna, zirtirtu leh thawktu rawihna bakah sum lama harsa te tanpuina turin Rs 64,24,500 hman a ni tawh a ni.