Russian Far East-a mihirng 28 chuanna thlawhna bo chu chhui zui a nih hnuah a tla keh hmuh a ni tih thuneituten an sawi.
An-26 thlawhna hi Russia hmar lam kil, Kamchatka peninsula-a Palana-a a tum hma lawkin nimin khan air traffic control chuan a bepawp thei lo.
A tlaknaa an hmuh atang chuan a chuangte zingah dam chhuak an awm a beiseiawm loh.
Thlawhna hi helai bial khawpui ber, Petropavlovsk atanga thlawk chhuak a ni.
Thuneitute chuan thlawhna hi Palana tumhmun a thlen hma km 9 emaw leka a awm laiin biakpawh theih a ni lo zui ta tih an sawi a, hei hi a tum hun hma minute 10 lek a ni tawh.
Leia a tlaknaah hian lung a su niin sawi a ni a, finfiahna erawh a awm lo va. Tuipui kam khawi emaw laiah a tla nia rin a ni.
Tass news agency chuan helai bawra airline hotu, Alexei Khrabrov hnen atangin thlawhna tla keh ruang hi hmuh a nih thu an tar lang a; mahse, thlawhna hmuh a ni tih bak hriat belh theih a la nei bik lo va, thu kimchang chu Nilaini lamah a hriat theih chauh a inbeisei tih an tar lang.
Thuneitute chuan thlawhnaah hian passenger 22 an chuang a, an zingah hian naupang pakhat a tel a. Mi dang paruk chu thawktu an ni.
Palana-a tual chhung sorkar hotu, Olga Mokhireva-i pawh a chuang zingah hian a tel.