Air India chuan US pana thlawk an thlawhna pakhat, rikrum thila Russia-a a tum a ngaih avanga a chuang tangkhangte phur turin thlawhna dang a tir.
Delhi-San Francisco flight hian passenger 219 leh thawktu mi 16 a phur a, a khawlpui chiang lo avangin Thawhlehni khan a tum ram a thleng zo lo.
Magadan airport, Far East region, Russia-ah a tum a ngai a. A khawl buai lai tak hi chianga puan a ni lo.
Nilaini khan Air India chuan chhun dar 1:00-ah Russia atanga San Francisco pan tur passenger leh thawktute hi lak chhuah tumin thlawhna an tir tih a sawi.
“Thlawhna hian ei tur leh mamawh dang a keng tel,” an ti.
Thlawhna tumhmun hi a chep avangin passenger-te hi ‘awmna tur hmun dangah’ dah an ni a, heta tang hian awlsam zawkin tual chhung khualbuka insawn a rem zawk tih an sawi.
“Khaw kilkhawr tak, Magadan leh Russia-a Air India thawktute chuan a theih ang angin an pui a, Vladivostok-a Consulate General of India-a liaison officer pawh biak reng a ni a, Indian ministry of external affairs, tual chhunga awm mek leh Russian thuneitute pawh dawr reng an ni,” an ti.
Nilaini zingah khan Twitter-ah pakhat chuan video dah chhuakin passenger-te hi chhuatah muin pindan pawh a chep hle a, inhnaih takin an mu a ni tih a lang.
Video comment-tute chuan Air India-in a ngaihsak tawk lo nia sawiin passenger-te chu an mamawh ang thil tha an pe lo niin an sawi.
Thawhlehni khan airline hian an thlawhnain harsatna a tawh thu leh Russia-ah him taka tumtir an nih thu a sawi.
“Air India flight A1173, Delhi atanga San Francisco pan chu khawl lam fel lo a awm,” an ti a, “Thlawhna chu leiah endik nghal a ni,” an ti bawk.
United States pawhin an ngaihven reng tih an sawi ve bawk.
“Ngun takin kan thlithlai reng a ni,” tiin Vedant Patel, State Department Deputy Spokesperson chuan thuthar lakhawmtute hnenah a sawi.
Mi chuang zingah hian US mi leh sa pawh an tel nia a lan thu a sawi a; mahse, an zat chiah an hriat theih loh thu a sawi bawk.