Abubakar Shekau, Nigeria rama hel pawl Boko Haram hotupa ber chu amah a inthat niin an hmelma, Islamist hel pawlin audiotape an tihchhuahah an tar lang.
Chawlhkar hnih liamta atangin Shekau hi a thi tih thuthang a awm hnuah Boko Haram hnen atanga news agency-ten audiotape an dawn atangin an hruaitupa hi an hmelma, Islamic State West Africa Province (ISWAP) nen an inhmachhawn tumin amah a inthat niin a lang.
“Khawvel pum huapa mualpho aiin tun hunah hian mualpho a thlang ta zawk a. Bomb hmangin amah leh amah a inthat ta zawk,” tiin ISWAP hotupa, Abu Musab Al-Barnawi chuan Kanuri tawng hmangin a sawi.
Nigeria hmarchhaka indona kum 10 dawn tichhuaktu hi an pawl Boko Haram chuan a thih thu mumal takin an la puangzar lo.
Shekau hi tun hmain a thi tih thuthang a tam tawh hle a, a hnuah a rawn inlar leh zel thung.
Kum 2014-a zirlai hmeichhia 300-te Chibok atanga ruk bo an nih tum khan Shekau hi khawvelin a hmelhriat tan.
Vawi tam tak pawl pahnihte an inhmachhawn hnuah Shekau leh a pawl thenkhatte chu June 2 khan ISWAP hel pawlten Boko Haram hmunpui Sambisa ngaw chhungah an hual a. Tlawm chunga inpe turin hun an pe hial niin an sawi.
ISWAP-te hian Shekau-a chu an chenna inah luhchilhin silaiin an inkap nghal a. An in atanga tlanchhiain ni nga an zawng a. An hmuh hnuah tlawm mai tura an tih laiin a inthat ta a ni.
Shekau-a hian thuneihna a neih lai chuan Boko Haram ho hian bomb tihpuah, mi ruk bo leh jail tang chhanchhuahnaah a che nasa hle thin.