Rimawi khawvela band lar tak Rammstein puipa Till Lindermann chu concert zawh hnu-a hmeichhe fan te mutpui thina puh niin, boruak a rit.
Thla hmasa khan hmeichhe pakhat chuan Vilnius-a afterparty-ah a thil in turah eng emaw telh sakin, a talbuai zui hle nia a lo sawi tawh chu heti ang deuh tho a inpuhna dangin a zui leh vangin German rock band hi nizana Munich khakwpuia zan li concert an neih turah zawhna leh thlaphanna a tam nghal.
Zan li concert turah hian ticket hralh zawh fai vek a ni a, hetia inpuhna a rik chho tak vangin promoter te chuan show zawhah afterparty a awm loh tur thu an puang nghal a, stage hmalama awm te’n ‘row zero’ an tih maia band member te nena inhnaih leh inpawha taka chetvelna pawh tihtawp a nih tur thu an puang tel bawk.
Inpuhna lo rikchhuakna hmasa ber chu May 25 liam ta khan kum 24 mi Northern Ireland-a cheng fan pakhat chuan band puipa chetdan a sawichhuak a, Vilnius, Lithuania-a concert-ah tawnhriat duhawm loh leh lungchhiatthlak tak a tawngbua niin, a sawi.
Rammstein hi German chhulchhuak band zinga hlawhtling bera chhal niin, heavy metal guitar ri ngan tak mai leh state-a an inlan dan pui rem rem tak vanga hriatlar lehzual niin, 1994 kum daih tawha band din tawh chetvelna hian ngaihven a hlawh thin reng a ni.
Nazi hun laia tawngkam hman thin lar leh langsa rte an chhakchhuak fova, an awm herh duhdan te nen pawh sawi zawm an ni fo.
Hetih lai hian Rolling Stone magazine-in a kawmnaah Lindermann chuan ‘Nazi ho hi kan hua’ a ti ve thung.