French Open tan dawna tennis ngainatute titi lian pakhat chu seeded number one Carlos Alcaraz leh champion tura rinkai Novak Djokovic te intum thei tur a ni a. Tunah semi-final-ah a tak ram a chang dawn.
Kum 20 mi, mipa tennis a player talent nei tha leh hmasawn chak Alcaraz-a’n French Open semi-final lut turin Stefanos Tsitsipas chu a sawp a. Greek star seeded number five nihna hauhtu hi 6-2 6-1 7-6 (7-5) in a hneh.
Kum 2021 a Roland Garros a final khel Tsitsipas lakah hian Alcaraz-a’n set hmasa berah game thumnaah a khingpui service a break sak a, 2-1 a hma a hruai hnuah inkhel thunun hneh viau in kum 24 mi Tsitsipas hian chhanletna tur a nei lo.
Alcaraz-a’n a ‘all-round game’ thatzia lantirin minute 34 chhungin set hmasa ber a la a. Tsitsipas hi set hnihnaah talbuai chhunzawmin ball vuak dik atang point hmuh vawi 13 chiah a nei.
Set thumnaah pawh Alcaraz-a’n hma a hruai fal hman viau a, mahse Tsitsipas hian a tawp lamah a beilet a. Beisei insiam hman mahse a dang tak tak thei lo.
Inkhel zawhah Alcaraz chuan inkhel leh tur thlirin, “Mi zawng zawngin an en duh inkhel a ni dawn a, a inkhel turte tan pawh a nuam viau ang. A tha ber nih duh chuan a tha ber kan hneh a ngai, Djokovic hi khawvela tha ber zing ami a ni a, ka nghakhlel tawh hle.” tiin a sawi.
Kum 36 mi Djokovic-a’n tun tournament kheltha viau mahse semi-final luh a tumna kawngah a chesual teuh. Karen Khachanov nen inkhelin set hmasa a hloh hnuah 4-6 7-6 (7-0) 6-2 6-4 in a chak.
Tun tournament-ah hian seeded number three hauhtu Djokovic hi a champion a nih chuan mipa tennis chanchin a Grand Slam title palite vawi thum theuh la tling thei hmasa ber a ni ang.
Tun tournament-ah Khachanov nen an inkhelh hma in set a hloh miah lova, mahse Russian mi lakah hian bul tan tha lovin break point vawi ruk lai a dansak a ngai.