Kan thenawm state Manipur buai chuan ziaawm lam aiin zual lam a pan zel niin a lang a. Nitin indona leh khaw inhal sak, silai ri chu a zual zel a. Union minister Amit Shah in ni li lai chama a han thutchilh viau pawhin eng buaina mah a titawp lova. A cham lai ngei pawhin inkahna a tawp chuang lova. A hawsan hnuah a zual zui chho a. Meitei leh kan unau Zohnahthlak te inbeihna hi engtia chinfel tur nge tih central sawrkar hian a hre lo ni berin a lang.
Buaina titawp tur hian central force tam tak an thawn lut tawh a. Mahse, central force te hian hma han la dawn ngial mahse an rama thuneitu ber chief minister Biren Singh chu zohnahthlakte Manipur atanga nawrchhuah vek duhtu leh a khaipa ber anih avangin a state police te hmangin buaina tizual turin a bei reng a. He state ah hian Biren Singh thuneihna hi tih tawp anih hma chuan buai hi a reh dawn lova. Thihna leh manganna chuan thla a la zar dawn chauh a ni.
An ram hruaitu berin zohnahthlakte hnawk ti a, nawrchhuah fai vek a tum hi keini Mizoram mipuite tan chuan zan mutmu tuah hleih theih lohna khawp a ni ta. Kan unaute silaimu karah lengin an innghahna chu Mizoram ngei chauh hi a ni tiin thu an rawn thawn thin. Mahse, kan ram mipuite laka an aurawl chu kan ngaihsak miah lo emaw tih turin kan ngawi thup mai a. Mizote hi eng kan ti ta nge ni le. Mahni unaute mangang aurawl in min auh harh zawh tawh loh chuan hnam tihte hi sawi sawi ve tur kan ni dawn em ni? Heti khawpa mizote chunga hleilentu Biren Singh hi a bang tur a ni tihte tal hian kan NGO te hi an auchhuah a va hun em.
He buaina titawp tur hian kan unauten an duh ngawih ngawih Manipur state president’s rule a dah anih theih nan hian vawikhat tal kan aw chhuah ila. Vawikhat pawh mipui aw hriat tur awm lova kan awm hian kan nepzia kan lantir zel rih dawn em ni? Aizawl khawpui hian kan unaute aw hi ngaithlain mipui punkhawmna tal hi nei ve ila. He mizo hmelma Biren Singh dahbo a nih theihna tur hian kawng te pawh i zawh ve ang u. Central sawrkar hian kan thu leh hla an bengkhawn a ni tih hria ila. Zohnahthlak unaute hian thlavang hauhtu an nei a ni tih tal hi Aizawl khawpuiah hian i lantir ang u.