Aizawl: MNF party chuan ZPM party chu kalphung thar, thuneihna sem zai tlangaupui reng chungin an MLA-ten local council an ngaihthah hle tih an sawi a, Aizawl North II MLA Dr Vanlalthlana chu a bial chhunga local council-te rep charah an puh.
MNF Media & publicity hruaitute chuan nimin khan Aizawl Press Club-ah thuthar thehdarhtute an kawm a, MNF General Secretary VL Kroshnehzova chuan Aizawl North II bialtu MLA Dr Mathlana hian a bial chhung veng pakuaa local council te chu MLA fund a pe ve ngai mang lo a, a pek ve nia lang pahnih khatte pawh hnathawh leh a hlawkna awm zawng zawng chu ZPM-in an pumhmawm vek zel tih a sawi.
VL Kroshnehzova chuan heti taka party invulh bikna kalpui mekin ‘mipui sorkar’ an zuar ngam leh a sawitu bera Dr Vanlalthlana a la tang ngam chu zahthlak an tih thu leh mipui bum tumna dik tak nia an ngaih thu a sawi.
Aizawl North II bialtu MLA-in Ramthar North Branch YMA hminga hna a pek, Construction of RCC Road, Rs. nuai 15 man, ZPM Block-in an thawh chu tun hnaiah an tlawh a, kawng siamna tura pawisa ruahman, Rs. nuai 15 chu a tam uchuak hle a, an hnathawh dan nen a inmil lo hle tih an hmuh chhuah thu an sawi a, MLA leh ZPM party hian uchuak takin sum siam nan mipuite mamawh em em kawng siam hna chu an hmang niah an ngai tih leh hetianga ZPM party-in YMA hming an tihliau chu pawi an tih thu a sawi bawk a ni.