Canada-a ram kang nasa tak avangin North America khawpui lian tak taka cheng mi maktaduai tel chu boruak chhe takin a tuam phah mek.
Meikhu dum tak hian Canada-ah chuan Ontario leh Quebec bakah Toronto leh a chhehvel hmun zau tak a tuam.
Meikhu hi US-a New York City leh Connecticut pawh thlengin boruak chu ‘hrisel lo’ huangah dah a ni.
Meikhu tam zawk hi hmun 160 zeta ram a kan mekna, Quebec atanga lut a ni.
Environment Canada chuan Ottawa tan Thawhlehni khan boruak bawlhhlawh avanga inralrinna sang ber a tichhuak a, Canadian khawpuia mite tan chuan an boruak chu ‘very high risk’ tiin a tar lang a ni.
Toronto leh a chhehvel chu boruak him loh dan chu ‘high risk’ tiin a sawi bawk.
Hetih lai hian US Environmental Protection Agency (EPA) pawhin an ram hmarchhak lam boruak tak zawk chu ‘hrisel lo’ a ti a, a bik takin thawkna lama harsatna nei sate tan a him lo zual niin a tar lang.
Boruak tha lo laka invenna tur hi New York City leh Connecticut tana siam a ni a. Hmar lamah Boston leh chhim lamah Pittsburgh leh Washington DC thleng pawha huamtir a ni bawk.
Pennsylvania khawchhak lam hmun thenkhat, New York leh New England-ah chuan an Air Quality Index chuan 200 a kai a, chu chu ‘tute tan pawh hrisel lo tak zet’ tihna a ni.
New York-a Thawhlehni tuka thlalakah chuan Canada-a ram kang khuin chhim lam a luh avangin van boruak a sen phut (serthlum rawng ang) tih a lang.
Vantlang hriselna lam thuneitute chuan mipuite chu pawnah tei chhuak tam lo turin an ti a, chutiang boruak tha lo hip chu tun atan mai bakah nakin zela hriselna nghawng thei a ni tih an sawi.
Ram kang khu avanga boruak chhe lutuk avangin Quebec-a region pakhatah, Montreal atanga hmar lam Opitciwan-a cheng Atikamekw hnamte zinga thawhah leh thawkna lama harsatna neite chu hmun him zawkah sawn phah an ni tawh.
Canada-ah hian kum dang angin ram kang an ngah zawk a. Sorkar laipui chuan Thawhtanni khan khua a ro avang leh a lum em avangin kum dang aiin an kang nasa thei niin an sawi bawk.
An rama ram kang hian ram hectare maktaduai 3.3 chuang a kang chhe tawh a, kum 10 liam ta chhunga kum khata kang thin chawhrual aiin a let 12 zeta zau a kang tawh.
Mi sang tam tak hmun himah sawn chhuah an ni tawh a, Quebec chu a tuar na ber niin ram hectare 2,00,000 vela zau a kang tawh.
British Columbia, Alberta, Ontario, Nova Scotia leh Northwest Territories an tihah te a kang mek hlawm bawk.