Samagra Shiksha leh Evangelical Teacher’s Fellowship, Mizoramte tangkawpin ‘Zirna hmanga khawtlang nun inthlak danglamna- Social transformation through education’ tih thupui hmangin nimin khan Champhai District-a School Management Committee (SMC) leh School Management & Development Committee (SMDC) te tan training an buatsaih.
Kahrawt Community Hall-a training buatsaih hi DEO & DPC, Samagra Shiksha, Champhai District C. Lalbiakzauva, chuan kaihruaiin, training kaltlanga zirho tur chu zirtirtute leh zirna lam kaihhnawiha telte tana pawimawh tur a nih thu a sawi a. SMC leh SMDC te’n hmasawnna an neih ngei a beisei thu sawiin duhsakna a hlan a ni.
Training-ah hian Dy. SPD, State Project Office, Samagra Shiksha, Mizoram C. Chawngthantluanga hnen atangin SMC leh SMDC te nihna leh mawhphurhna a ken tel te ngaihthlak a ni a. SMC leh SMDC te chu school enkawlna kawngah an pawimawh em em laiin tunlaiah a hminga awm ve mai mai anga ngaih theihin a awm mek tih a sawi a; a nihna tur ang taka hman chuam school enkawl leh hmasawn zel kawngah awmze thui tak a neih thu a sawi.
School neitu tak tak te chu a awmna veng leh khawtlang an ni tih sawiin, a thawktute chu inthlak reng an nih laiin school erawh chu a hmun ngaiah a awm reng avangin a neitu tak tak leh a chhawr tangkai bertu chu a veng neitu khawtlangte an nih thu a sawi.
SMC leh SMDC ah pawh khawtlang mite an pawimawh thu a sawi bawk a. SMC leh SMDC tih tur pawimawh tak chu school tih hmasawn a nih thu sawiin, school hmasaw- nna tura tih tur awmte a tarlang nghal bawk.
Associate Professor (Rtd), IASE Dr. Hmi- ngthanzuala hnen atangin ‘Zirna hmanga khawtlang nun thlakdanglam’ tih hmangin thu pawimawh tak tak ngaihthlak a ni a. Dr. Samuel Vanlalthlanga, Associate Professor, Aizawl West College leh Rev. Dr. Lalchu- ngnunga, Former Principal, Serampore College-te hnen atangin zirna chungchang leh zirna hmanga khawtlang nun thlakthleng a nih theih dan kawng hrang hrang ngaihthlak a ni bawk a ni.