Aizawl: Rural Development Minister Lalruatkima’n Mizoramah Self Help Group (SHG) 9124 din a nih tawh thu leh sorkarin SHG-te hmasawnna a ngaih pawimawh thu a sawi.
He thu hi nimina Mizoram State Rural Livelihoods Mission (MzSRLM) ‘Annual Action Plan 2023-24 Roll Out Workshop’ kharna a hmanpuinaah a sawi.
Ruatkima chuan SGH 9,124 din tawhah member 75,200 an awm mek thu sawiin, “Sorkarin an hmasawnna tur a ngai pawimawh a, an tan hmasawnna rurel eng emaw zat siam a ni tawh,” a ti.
RD minister chuan SHG member-ten sum an inpuk chhawn tur, Community Investment Fund (CIF) Rs. nuai 15,541.09 chu VO/CLF-ah pek tawh a ni a. Heng community fund an puk kual leh MzSRLM kaltlanga training hrang hrang an dawnte hmang hian thingtlanga mi harsa zawkten eizawnna ngelnghet an neih phah mek tih a sawi.
Ruatkima chuan MzSRLM hnuaia hlawhtlinna changte chu entawntlak a tih thu sawiin, “‘Theihtawpa kawng zawn chuan theih loh a awm lo’ tih mite hriattirtu an ni,” a ti.
India ram chhunga midangte entawn tlak khawpin Mizo nute hian theihna an nei a, SHG member-te chu tan la zual zel turin a sawm a ni.
MzSRLM Annual Action Plan Workshop hi block leh district hrang hranga MzSRLM hnathawkte tan May 30 atang khan neih tan a ni a, kharna inkhawm Assembly Annexe Conference Hall-a neih hi state Mission Manager (Non-Farm) Dr. F. Laldinthara’n a kaihruai a, SHG kaltlanga hlawhtlingte chanchinte ngaihthlak a nih bakah thupui hrang hrang zirhona leh sawihona hun hman nghal a ni bawk.