Aizawl: Mizoram SSA Teachers Association (MSSTA) hruaitute chuan nimin khan Chief Minister Zoramthanga chu a pisaah hmuin, high court thutlukna anga SSA teacher-te dah ngheh ve theihna tur scheme siam turin an ngen.
MSSTA hruaitute hian nimin chawhma khan chief minister hi an hmu a, an inbiakna ngaichang hian MSSTA member thahnem tak chu CM office gate bulah an pungkhawm.
An inbiaknaah hian MSSTA hruaitute chuan court thutlukna anga SSA teacher-te dah ngheh ve theihna tur scheme siam turin CM hi an ngen a. Zorama chuan MSSTA ngenna chu a lo ngaihtuah tur thu leh court thu chhuak appeal tura file kal mek pawh a lo zir chian ve tur thu a sawi a, CM thutlukna tel lo chuan thutlukna siam a nih loh tur thute a sawi a. MSSTA hruaitute pawhin thu chiang ngaihchan an rem ti a, CM hnenah hian an pawl duh dante an hrilhfiah a ni.
MSSTA hruaitute hian CM nen an indawr zawh hnuah an inbiakna chungchangte chu an member pungkhawmte hnenah an hrilhfiah a, pungkhawmte pawh an tin darh ve leh ta a ni.
High court thuchhuak hi sorkarin appeal lova SSA teacher-te tana hamthatna ruahman nana hman tangkai zawk hi, MSSTA chuan a la beisei tlat a, sorkarin a ngaih pawimawhsak ngei a phut tlat bawk a ni.