Aizawl: Aizawl-a Cyber Crime Police Station din a nih hnuah inbumna pawisa Rs. nuai 24 chuang hmuh let tawh a ni.
Mizoramah May, 2020 atangin Cyber Crime PS din a ni a, chuta tanga chhutin inbumna pawisa Rs 24,31,405 hmuh let leh niin, a neitu dik takte hnenah pek let leh a ni tawh.
Hemi piah lamah an bungraw chah, a man pek lawk tawh bungraw thleng thei lo ang chi-ah belhkhawmin Rs 16,00,000 hu bungrua hmuh letsak a ni tawh bawk a ni.
National Cybercrime Reporting Portal (NCRP) hmanga mipuiten Mizoram Police hnena complaint an thehluh bawhzuinaah inbumna pawisa Rs 11,05,080 chu bank chi hrang hrangah khawih chet theih lohin ‘Hold’-a dah a ni a, a neitu dik takten an hmuh let theih nan theihtawp an chhuah mek bawk a ni.
Mizoram Police chuan internet (online) hmanga inbumna hi a hluar chak hle a, Mizoram bikah chuan cyber-crime zingah sum leh paia inbumna hi a hluar ber tih an sawi a, complaint dawn zawng zawngah pawh 75% chu hetiang chi inbumna hi a ni tiin sum leh pai dap kawngah leh hman chhuah danah fimkhur reng turin mipuite a chah nawn leh a ni.