India-a police-te chuan Mumbai khawpuia hmeichhe thihna, in khata kum thum zet a chenpui (live-in partner) tawhin a thah ni ngeia hriat chu an chhui mek.
Kum 32 mi, Saraswati Vaidya-i ruang hi Mira Road district-a an chenna apartment-ah Nilaini khan hmuh a ni.
Police chuan a kawppui, kum 56 mi, Manoj Sane chu tualthah thubuaiah an man nghal a. ‘Rawng takin’ Vaidya hi thatin a ruang pawh a thuk ru niin an puh.
Sane-a hi police kutah awm mekin an puhna chungchangah hian engmah sawi a la nei lo.
Police hian Sane-a te chenna apartment-ah hian an thenawm hnaiten an in atangin thil rimchhe tak a chhuak thin tia an sawi bawhzuiin an pan.
Apartment chhungah hian Vaidya-i ruang tawih tawh tak an hmu ta a, a taksa chu chan darh nuaih a lo ni bawk.
“He tualthahna thleng phena awm hi kan chhui mek a, engtianga thah nge a ni tih pawh kan dap a. Hmeichhe ruang hi a tawih ral awlsam zawk nan chan darh ni ngeiin a lang,” tiin Deputy Commissioner of Police Jayant Bajbale chuan Hindustan Times chanchinbu hnenah a sawi.
Police chuan inthahna hi ni hnih thum vel liam taa thleng a nih an ring a, forensic thiamten endik turin sample an la.
“Tunah rih chuan thil a la buai rih hle a, Vaidya-i tana dikna hlenchhuah ngei kan tum a ni,” tiin Bajbale chuan thuthar lakhawmtute hnenah a sawi.
India-ah hian hetianga inthahna hi tun hnaiah a lar hma hle a, thla sarih emaw lek kal taah khan mipa pakhat, Aftab Poonawala chu a chenpui thin thata puh a ni a, a thah dan pawh tuna mi ang deuh chiah hi a ni.
Police chuan kum 28 mi, Poonawala-a hian a bialnu kum 27 mi, Shraddha Walkar chu nikum May khan thatin a ruang chu sawm takin a chan a, an chennaa fridge-ah dahin tlem tlemin khawpui chhung hmun hrang hrangah a thehdarh kual niin an sawi.
He inthahna hi ‘fridge murder’ tia sawi niin India-ah hian chawlhkar tam tak ngaihven a hlawh a ni.