Real Madrid chuan Borussia Dortmund atangin England midfielder Jude Bellingham chu Euro maktaduai 103 a lalut turin inremna an nei.
Kum 19 mi hian Spain lam pan hi a duh a, karleh hian medical nei fel a insawn tura ngaih a ni.
Europe club liante ngaihven England international hian kum 2020 July thla khan Birmingham City atangin Dortmund hi a pan a, Germany-ah hian khawvela midfielder ngaihven hlawh ber zingah invawrh theiin nikum a England in World Cup an khelh tum pawhin an player tangkai zingah a tel.
A khelhna club Dortmund hian Spanish club nen hian Euro maktaduai 103 a inremna an neih thu an puang a. A man pangngai bakah hian inpek belh tur neuh neuh la nei bawkin Euro maktaduai 135 man vel a ni thei dawn.
Tun season a Bundesliga Player of the Season chawimawina dawngtu Bellingham hi khawvela kum 20 tling lo player manto ber pathumna a ni dawn a. Real Madrid in kum 2019 a Euro maktaduai 115 a Eden Hazard an lakluh tih love Real Madrid chanchin a player manto ber a ni ang.
Tun season liamta khan Dortmund tan vawi 42 inkhelin goal 14 a khung bakah assist vawi 7 a nei.