India-a hmeichhe wrestler lawk tak takten an pawl hotupa berin mipat hmeichhiatna hawiin an laka mawi lo takin a che nia puha lungawi lohna an lantir chu minister nen an inkawmnaah chhui a tiam avangin an titawp rih dawn.
Wrestler-te hi April atang khan Delhi-ah Brij Bhushan Sharan Singh-a man phutin an lo awm khawm tan tawh.
Nilaini khan Sports Minister Anurag Thakur hmuin darkar ruk dawn an inbia a. Thakur-a hian police-in Singh-a an chhuina chu June 15-ah an zo dawn tih a sawi.
Wrestler-te hian hemi hma hi chuan an lungawi loh lantir chu an titawp rih dawn tih an sawi.
Sorkar hian June 30 hmaa Wrestling Federation of India (WFI) executive committee inthlan huaihawt a tiam bawk a. Hetah hian Singh-a emaw, a thuihhruai hnai tumah an tel tawh loh tur thu an sawi bawk.
“Kan ram tan chawimawina dawng thei infiam mite hi kawngpuia an awm aiin mat-a an awm a tha zawk,” tiin Thakur hian an inbiak hnuah The Indian Express chanchinbu hnenah a sawi.
Singh-a hi rorel lai, BJP MP thiltithei tak niin an puhna hi a pha a, ‘politics avanga beihna’ niin a sawi.
Police hian Singh-a lakah hian thubuai pahnih an ziak lut tawh a, pakhat chu Protection of Children from Sexual Offences Act (Pocso) hnuaiah a ni.
Singh-a hian dan chu hman sual a nih thu a sawi a. Police-in thu pawh an zawt tawh a, an la man lo thung.
Nilaini khan Thakur-a hmutu zinga mi, Olympic medallist Bajrang Punia chuan sorkarin an duh angin Singh-a chhuina hi karleh an zo dawn tih a sawi.
“Mahse, June 15-ah pawh engmah hmalakna a la awm lo a nih chuan kan kal zel ang,” a ti.