- H. Lalhmachhuana, Zobawm In
Hei, kumin 2023 November thla khian MLA General Election chu kan nei dawn a nih hmel a, Pol.Party tin ten Mizoram mipui tam berte hamthatna tur nia an ngaih Flagship program an duan te chu an rawn zuar leh ngei dawn a; mipuite chuan kan tana tha tur nia kan ngaih Policy neitu Party chu kan thlangtling leh ngei dawn a ni.
Kum 20 lai rambuai kan nih hnu 1986 a Remna leh muanna kan neih atang kha chuan Economic Rehabilitaton/ Economic Policy tha tur nia kan hriat neitu Party apiang lalna kan chantir zel a ni ber a, Kumin inthlan hunah pawh hian, khuarel chhiatna Covid-19 tuar zo hlim kan ni bawk a Economic Policy tha nei nia kan hriat Party bawk kan thlang tling leh ngeiin a rinawm a. Tichuan kan Party neih zinga a lian 3-te Flagship Program te hi thlir(zir) hona nei ila, tichuan ram mipui tam berte hmabak tur kan hrethiam thei dawn a ni.
a) CONGRESS Party chuan TANGPUIH, hna thawk tak taktute, mahni hna thawka tang tak takte hnena Rs.200000/- pek zel chu Flagship Program an neih a nih hmel a. He Policy hian thatna tur leh that loh theihna tur a nei ve ve awm e.Congress hian ‘kan ti ang’ an tih chu an ti deuh zel a; tin, thawk tak takte hnena puihna Rs200000/- pek chuan hlawhtlin a awlsam ngei dawn a ni. Mahse an term hmasaa NLUP an sem khan Party mite hnena sum sem mai anga a ngaih theih a, bakah an term tawp lam phei kha chuan Sawrkar Official te khan an duh dana sum an semte khan mamawhtu mipui nawlpui a thleng pha lo a ni ber a. Tuntumah hian an Policy enkawl (implement) dan tur azirin a hlawhtlingin a hlawhchham thei ngei ang a, tichuan heng TANGPUIH Policy hian Zofate kawng dik min zawhpui dan tur engtin nge ni dawn le?
b) MNF hian SEDP bawk hi Flagship Program-a hman zawm an tum niin a lang a. He SEDP hi a bua ziak ang leh an zawrh dan ang kha chu Policy leh Program tha em em, ram Economy chawikan dawrh theihna tur pawh a ni ngei a. SEDP tihlawhtling ngei turin MNF sawrkar hian Development Board 10 chuang lai din mah se an chet tan dawn laia Covid-19 thlen avangin heng Board te pawh hi hna an thawhtir hlawm lo a ni ber a. Project based (hna thawh mil zel) a thawktute pui tura insawi ni mahse an term tawp dawn lamah NLUP sum sen ang deuh maiin Rs25000/50000 te an sem thei ta chauh mai a. Tin, an SEDP bua inziak lam ai mahin cheng 300000/- sem tum leh sem lawk si loh chu mi tam tak sawisel a hlawh hle tih kan hria. Chutihrualin Covid-19 thlen avanga sawrkar Budget sum v.b.c 3000 vel kum 2 chhung an dawn loh avang leh chhan dang dang avangin an tum angin an che thei ta lo a ni fahmiang. Chu pawh ni se SEDP atan aia hmun dang leh contractor thenkhat te hnena sum luantir awm fo nia thuthang awm te chuan SEDP ngai pawimawh tawk lovah mi tam takin kan ngai a ni. Engpawhnise tunah chuan khuarel chhiatna te thleng tawh lova tha thar leh boruak thara he SEDP hi enkawl zawm an tum anih chuan engtin nge enkawl (implement) an tum, an duan dan leh sawi dante azirin mipui hian ngaihdan kan siam thei dawn a ni mahna.
c) ZPM chuan BANAKAIH, kuthnathawktute puih an ngaih apianga tanpui zel chu Flagship Program an neih ber niin a lang a, tin chubakah thlai thar chi 4 emaw chu man tha tawka leisak vek tumna an sawi uar hle bawk a. He/Heng policy hi tihhlawhtlin theih chu ni ngai se mipui tan chuan ‘Pheichham man’ ang thaw nihna tur a ang thei hial mai. Amaherawhchu Zoramah hian banakaih (tanpui) ngai tur kan tam tur zia chhut chuan sum mamawh tur chu NLUP leh SEDP atana hman te aiin a tam hial maithei a; chubakah thlai thar chi 4 vel leisak zel dawn chuan sum dang a tul tam dawn em avangin World Bank/ADB adt. atanga puk te pawh an tul ngei maithei a; tin, sawrkar hi chu thlai thar te lei thintu nih a that loh zia Zoram hian kan lo tawng tawh kha a nia. Chuvangin tum dan dang, mithiamte leh Party dangte pawhin an lo sawi ang deuh thoin Business Farm leh Company rintlakte nena in tie up/ thawh hona siam a support price te hmanga hmalak tumna pawh a ni mai thei e. Engpawhnise he ZPM Party Flagship Program te hi thatna nei leh ngaihzawnawm tak, implement dan tur erawh ‘mumang ram’ ang deuh a la ni a, Flagship program Banakaih dan remchang ber chu ‘sumsem’ tho a nih a rinawm. A tak ramah engtin tak enkawl ang maw?
Aw le, heng Party 3 te Flagship program te hi dik tak leh fel taka enkawl chu ni hlawm se ram mipui hian (leh ram hian) kan thatpui dan tur a awm vek a. Tu party pawh hian lalna chang se an policy pui ber hi rorelna dik taka an enkawl ngei beisei phawt mai ila. Zoram hmabak tur chu kan thlan lal ten an Flagship Program an enkawl dik leh enkawl that dan (rorelna dik kenkawh) ah a innghat thui hle dawn a ni.