Aizawl : DP&AR (GGC) leh ATI tangkawpin an buatsaih ni thum awh -Training on Sevottam For Nodal Officers of CPGRAMS” chu nimin khan Administrative Training Institute (ATI), MINECO -ah khar a ni a. He training hi June ni 7, 2023 (Nilaini) khan Secretary, DP&AR R. Lalramnghaka’n a hawng a ni.
Sorkar thuchhuahin a tarlan danin, he training thupui kengtu ‘Sevottam’ tih chu thumal pahnih Seva (service) leh Uttam(excellent) atanga lo piang a ni a, heng thumal pahnih hi zawmin a saptawng chuan ‘excellence in service’ tih niin, mipui rawngbawlna/hnathawh tha thei ang ber pek a tum ber a ni.
Sevottam hi Department of Administrative Reforms and Public Grievances (DARPG), Govt of India-in a duan a ni a, khawvel hmun hrang hranga kalphung leh tihdan tha zir atanga duan a ni a. India ram chhunga sorkar peng hrang hrang ten an hnathawh kawngah hma an sawn zel a, a tha ber an thlen theih nan a hmalak hi a tum a ni.
Training-ah hian Mizoram sorkar department hrang hrang aiawh officer 150 an tel a. Officer tel te hi Sevottam peng pakhat, mipui ten awlsam zawka an lungawilohna an thlen theihna leh a chinfelna hmanraw pawimawh tak Centralised Public Grievance Redress and Monitoring System (CPGRAMS) enkawl tura ruat Nodal Officer te an ni.