Ultimate Fighting Championship chuan August 6 a UFC Fight Night a buatsaih tura main event atan Cory Sandhagen leh Umar Nurmagomedov te inhmachhawn turin a ti fel.
UFC chuan he 135 pound bout hi Zirtawpni zing khan a puang a. Nashville khawpui a Bridgestone Arena-ah neih a ni dawn.
16-4 MMA record nei Sandhagen hi UFC bantamweight rankings-ah no.4 ni lai a ni a. A tan tlawmin rankings-ah a dinhmun a khawih pha dawn a. Hetihlai hian a chak a nih chuan a tan champion title chuh a hnai viau tawh ang.
Tunhnaia a inlan hnuhnung pahnihah Frankie Edgar leh Marlon “Chito” Vera te hnehin vawi hnih chak zawn lai a ni a. Kum 2021 khan interim UFC bantamweight title inchuhin Petr Yan lakah round nga chhungin a tlawm tawh.
A khingpui tur kum 27 mi Umar Nurmagomedov hi vawi 16 inlan tawhah a la chak vek a. UFC bikah vawi li chak tawhin heng zinga vawi thum hi round khelh zawh ngai lova a chakna vek a ni.
Hetihlai hian Sandhagen te ang fighter tawnhriat nei tha tawh leh top five rankings ni pha fighter a la hmachhawn ngai lo.