Ram changkang tak ni mah se, zaithiam pakhatin an rama thil man a tito vek mai a, sorkar a mangan hman hle. Tu dang ni lovin Beyonce hian Sweden rama show a nei zet chu rampum a nghawng na khawp mai.
‘Renaissance’ tour kal zelah thla hmasa mai khan Sweden khawpui Stockholm-ah show ngan tak neiin, a lo kal dawn tih hriat a nih veleh hotel leh restaurant man a to nghal nasa mai a, mi sang tam tak kalkhawmna hmun tur a nih miau vangin engkim mai a to fai vek. Sorkar chhinchhiah danin May thlaa inflation hi an beisei ai daihin a sang a, 9.7% a tling hial.
Danske Bank-a chief economist Michael Grahn chuan CNN a hrilh danin, thil man to chiam mai hi thil pangngai ang ngaih theih a ni lova, milar tak tak an lo kal fo thin na a, heti taka nghawng a neih nat hi a awm lo, a ti.
Sweden rama bank lian ber hian kum 41 mi Beyonce huhang natzia leh rampum huap anga mimal khai pawha thil man a tito thei tlat mai hi pui tak a ni ringawt mai a, middle-class te tan thil lawmawm tak a ni reng reng lo.
Grahn vek hian, “Thil man to vakna chhanah Beyonce hi ka mawhpuh hauh lo. Mahse, a performance leh khawvelin a thlir thuap dan atang hi chuan Sweden-ah nghawng a nei tih erawh phat rual a ni lo thung,” tiin a sawi.
Swedish pawisa hi tun dinhmunah a hlut lutuk lem lova, a nihna takah chuan zan hnih ‘sold out’ concert-ah hian hmun hrang hrang atangin fan tam tak an lo pungkhawm a, ticket phei chu ram dang leh hmun dang ngaihtuahin a tlawm viau si a ni.