Nimin zing khan Vaivakawn Zohnuaia Lalthantluanga te kawmthlang chu nasa takin a min a, leimin avangin chhungkaw 11-te chu an chenna in atangin an inthiar chhuak.
Vaivakawn khawtlang hruaitute hnen atanga thudawn danin Lalthantluanga te kawmthlang lei hi Ningani tlai atang khan che tanin, nimin zing dar 6:30 khan nasa takin a min ta a ni.
Leimin hian a thlang lama Saron veng mi, |anpuia in sak lai concret floor hnih vel bakah NH 54 kawngpui pawh lirthei eng chi mah kaltlang theih lohin a hnawh phui vek a, kawlphetha inpek chhawnna 11 KV line pawh a tichhia.
Leimin avang hian in pathum, chhungkaw 11 luah lai chu dinhmun derthawngah awmin, chhungkaw 11-te hian an chenna in an chhuahsan a, khawtlangin hnatlangin an bungruate an thiarchhuahpui a ni.
An chenna in a him loh avanga inthiar chhuakte awm dan tur chu bialtu MLA Lalruatkima leh khawtlang hruaituten ngaihtuah nghalin, chhungte belh tur nei lote tan Rangvamuala BSUP chu an ruahman a ni.
Nimin khan PWD chuan kawngpuia lei tlate hi an thian nghal a, P&E pawhin leimin avanga 11 KV line chhia pawh siam tha thuai turin hma an la nghal bawk.