Cyclone na tak thawkin India leh Pakistan khawmual a nuai a, in chung a hawk a, thing leh electric ban a chhem thlu a, ruah tam tak a sur bawk a, mi sang tam takin power an neih loh phah.
India khawthlang lam, Gujarat-ah chuan Cyclone Biparjoy avanga tui lianin a lak mi pahnih an thi niin Zirtawpni khan thuneituten an sawi.
Biparjoy thawk tur avang hian ram pahnihah mi 1,80,000 chuang hmun himah thiar chhuah an ni a. A hming hi Bengali niin ‘chhiatna’ tihna a ni.
Ningani zan tlai tawh takah khan Gujarat-a lawngchawlhna, Pakistan nena inrina bul lawk, Jakhau bul atangin khawmual a kai niin khawchin zirtute chuan an sawi.
India-a Metereological Department (IMD) chuan Zirtawpni zinga bulletin an tihchhuahah Biparjoy hian khawmual a kai hnu lawkah a chakna hloh nghalin severe cyclonic storm atangin cyclonic storm-ah a tla tih an tar lang a. Thli a ken pawh darkar khata km 105 atangin 85-ah a tla thla a, thli a ken chak zawng hi chawhnu lamah chuan tlahniam leh tura an ngaih thu an tar lang bawk.
Gujarat-a Bhavnagar district-ah beram vulhtu mipa pahnih chu tuiin an ran a lak chhan tuma an thawh chhuahna lamah Ningani tlai khan an thi niin cyclone control room chuan a sawi.
Thli chak tak avang hian Gujarat-a Kutch district-a hmun tam takin power an nei lo niin district thuneitu, Amit Arora chuan a sawi a, chhanchhuah hna thawh mek zel a ni tih a sawi bawk.
India-a weather department chuan Gujarat leh a thenawm, Rajasthan-ah Zirtawpni nilengin ruah tam tak a sur thei tih an sawi bawk.
Pakistan-ah pawh disaster management authority chuan Zirtawpni khan cyclone hian a chakna a hloh tawh tih an sawi.
“Cyclonic storm-ah changin Zirtawpni tlaiah chuan depression chauh a nih tawh a rinawm,” tiin thu an chhuah.
Pakistan Meteorological Department chief Sardar Sarfaraz chuan cyclone hian Zirtawpni leh Inrinni thlengin vaukam hrulah ruah a tam dawn tih a sawi bawk.
“Cyclone chakna hi nasa takin a tlahniam tawh a, tlaiah chuan depression chauh a nih a rinawm tawh a. Ruah erawh a la tam zui dawn a, thli pawh darkar khata km 60 leh 80 inkar a la ni thei ang,” a ti.
Sarfaraz chuan sorkarin thuneitute hnenah mi 82,000 chuang hmun hima an sawn chhuahte chu khawchin thlir phawtin Inrinni hma chu la kirtir lo turin an ti tih a sawi bawk.
Biparjoy avanga harsatna tawk mekte hi nikum fura tui lian, Pakistan ram hmun thuma thena hmun hnih zet tuamtu tuar tawh tam tak kha an ni a, khe chhiatnaah khan chenna in maktaduai hnih vel chhiain mi 1,700 dawn an thi.