Democratic Youth Federation of India (DYFI) leh Tripura Youth Federation (TYF) chuan BJP mi leh saten Students’ Federation of India (SFI) state secretary Sandipan Deb leh a unaupa, Srijan Deb-a kut an thlak duh lohna lantirin Tripura khawpui, Agartala-a state police headquarters-ah an pung khawm.
Mi tu tih hriat loh, BJP thlawptu ni ngeia hriat site chuan SFI state secretary leh a unaupa hi Badharghat, Agartala-a an chenna inah kut an thlak.
Pawl pahnihte hi police lakah pawh an thin a rim hle a, a titute chu man chhuak thuai turin an phut.
“Kan state-ah hian eptu party lam hruaitute pawhin beih an lo tawk fo tawh thin a. Politics-a firfiaka chetna hi a tam; mahse, tumah man an ni ngai lo,” tiin DYFI state secretary Nabarun Deb chuan a sawi.
Kut inthlakna thleng duh lotute hian police-te chu dan leh thupek kenkawhah hlawhchhamin an state-ah curfew puan a ni chungin tharum thawhna a reh lo niin an sawi.
“Police-ten thil tha lo titute laka engmah an ti lo hi kan hre thiam lo,” tiin Deb chuan a sawi.
Tripura-a BJP an sorkar atangin tharum thawhna a tam zual niin a sawi bawk.
“Left-wing thalai pawlten Covid-19 len laiin thisen pek leh mi harsate puihna an sem a. Mite puitu khan beih an tawk,” tiin Nabarun chuan a sawi.
TYF state secretary Amalendu Debbarma pawhin politics-a firfiaka chetna chu ni tin a thleng a ti. “A titute hi BJP an ni,” a ti.
Insawisakna thlengah hian West Agartala police station-ah thubuai ziah luh a ni.