Firfiak laka beihpui thlakna kal zelah nimin khan Jaish-e-Mohammed (JeM) commander Sajad Afghani chu venhimna thawktu sipaiten an kaphlum.
Zirtawpni atanga hel pawl dap chhuah rûnpui neihnaah hian sipaite leh helhote chu nimin zing atang khan Kashmir chhim lama Shopian district-a Rawalpora hmunah an inkap leh tiin police-ten an puang.
Kashmir IGP Vijay Kumar chuan, “Jaish helpawl hotu zinga mi, an commander chu Shopian hmunah kahhlum a ni,” tiin a sawi.
JeM commander Sajad Afghani-a hi helai hmuna hel kahhlum pahnihna a nih thu sawi telin Shopian police-te leh venhimna hna thawktu sipaite chu lawmpuina a hlan nghal.
Fimkhur thilah helai hmun bialah hian internet service pawh titawp lailawk a ni.
United States siam M4 carbine rifle, UBL shell leh AK-47 rifle chu helho tawmna hmun atanga ralthuam an hmuh chhuah zingah an tel.
JeM commander Sajad Afghani hi hel pawla thalaite sawm lut thintu bera ngaih a ni.
Firfiak laka beihpui thlakah hian Inrinni khan Shopian Rawalpora thingtlang, Jammu & Kashmir-ah hel pakhat kahhlum a lo ni tawh bawk.
Police, sipai leh CRPF-te tangkhawmin he beihpui hi an thlak a. Ani hi Shopian district a Rakh Narapora khuaa mi, Jahangir Ahman Wani a ni a, Lashkar-e-Taiba firfiak pawla tel a ni thung.
Ningani khan Jaish-e-Mohammed (JeM) hel pawla mi pahnihte chu Anantnag district-ah sipaiten an lo kaphlum tawh bawk.