India ram hmun thuma thena hmuh hnih chuan kum dang aiin fur an dawng hma a. |um dang ang lo takin chawlhkar hnih hma lamah ruahtui an dawng tan tih nimin khan sik leh sa thlithlaitu department thuneituten an puang.
Tun kar chhungin India hmarthlang lamte pawhin fur ruahtui an dawng tan dawn niin an tar lang.
India ram laili leh hmar lamin fur ruahtui tha tak an dawn hma vangin nipui laia an tuh thin – buh, la kung, bekang leh be mu chiten an ngeih dawn a. Hemi avang hian a seng kawngah pawh lo neitute an che hma theiin a rinawm.
June thla kartawpa fur dawng tan thin, Punjab chuan hmun thenkhatah ruahtui an dawng tan tawh a. June 1-a dawng tan thin, Kerala chuan ni 3 atangin an dawng tan a; mahse, kum dang aia nasain an dawng thung niin India Meteorological Department (IMD) chuan a tar lang.
Fur intan phat atang hian kum dang aiin ruahsur hi 25%-in a tam a, India lailia ruahtui a tlak thatin a nghawng niin IMD chhinchhiahna atangin a lang.
Chhim leh khawthlang lama la kung, buh, bekang, vaimim leh be mu chite an ching tan tawh a. Hmar leh lailiah tun kar atangin thlai chi an thlak tan a rinawm tiin Mumbai-a inkhuar khawvel puma thlai zuara sumdawng thin firm lianin a tar lang.
“Buhfai leh tel siam chhuahna thlai chite a man a to avangin kumah chuan lo neituten an âwn a rinawm a. Hei vang hian bengkang leh buh chinna hmun a tam zawk a ni ang,” an ti bawk.
India hi khawvela buhfai thawn chhuak tam ber a ni a, tel ei theih -palm oil, soyoil leh sunfower oil la lut hnem bertu a ni thung.
India ram puma thlai chinna zatve laite chuan June leh September thlaa ruahsur hi an innghahna a ni a, tui khawla thlai tui pekna irrigation an hmang ve ngai lo a ni.