Mizoram Pradesh Congress Committee (MPCC) President Lalsawta chuan Mizoram tana sorkar tha siam tura an rinchhan chu Pathian a nih thu a sawi a. Mizo hnam leh sakhua himna turin Mizoram tan an sorkar dawn niin a sawi.
Nimina Congress Bhawan-a Friday Political Session hun an hmanah thu sawiin Lalsawta chuan Mizoram tana sorkar tha siam tura an rinchhan chu Pathian a ni a. Pathiam lam an en phawt chuan theihna an nei a. Pathianin hna a thawh miau chuan tawngtaia dil phak pawha an ngaih loh thlengin a chhang tih tih a sawi.
Kumin inthlan hi thusawi thiam leh haw haw inthlanna a nih loh thu sawiin Lalsawta hian, thusawi thiam leh infak mawi chiam hi hlimawm mah se, nun bengchheng, thusawi hriat theih loh a nih chuan awmzia a awm lo tih sawiin, “Kan thu sawi ni lo, kan nun hian thu a sawi zawk tur a ni,” a ti.
Lalsawta hian mipui leh ram leilung inang, enkawl dan inan loh avanga dinhmun inthlau tak an awm a. Dik tak leh fel taka ram leh mipui enkawl thiam apiang an ding chhuak mai thin a. Mizo hnam leh sakhua himna turin Mizoram tan Congress party an sorkar dawn tih sawiin, “MPCC treasurer atanga chawl ta, Pu Zodintluanga chuan Congress party tan nasa takin hna a thawk a, mi thar duhawm tak tak a lawmlut teuh a. Pu Lalrindika Ralte, kan MLA chungah Hachhek bial mipuiten rinna an nghat mek a. Pu KT Rokhaw, kan MLA pawhin a bialte tan a thawhhlawk em em a. Heng kan tanrualna avang hian Congress party hi kan sorkar dawn a ni,” a ti bawk.
MPCC Media Department Chairman Dr Lallianchhunga pawhin Congress party chu Mizoram mipuite tana beiseina pe thintu a nih thu sawiin, “MNF-in Mizo nationalism hmangin India sorkar an kap a, a nghawng leh sawhkhawk rapthlakzia chu tun thlengin a la reh lo. Kha hun thim taka Mizoram khai chhuaka beiseina petu chu Congress party a ni,” tia sawiin, tuna thlamuang tak, remna leh muanna neia hma lam an pan theih chhan hi Congress party vang a nih thu a sawi a. Kum 2008 atanga 2018 kha Mizoramin sorkarna a neih tawh zawng zawnga sorkar tha bera ngaih a ni a, kha sorkar aia tha zawk kha tunah hian Mizoram an pe leh dawn a. Mizoram mipuite tan an inhlan ral dawn tih a sawi.
MPCC Spokeperson Dr. Lallianchhunga chuan ZPM-ah mi tam tak an beidawng tan a. Congress party chuan Mizoram mipui beiseina thar an pe dawn a. Mi retheite khaichhuak turin Congress party chuan theihtawp a chhuah dawn a ni, a ti.
MPCC Treasurer Dr. Lalmalsawma Nghaka kaihhruai inkhawmah hian Mahila President Vanlalawmpuii Chawngthu, Social Media Department MPCC Chairman C. Lalhriatpuia, MPYCC President Laltawnliana leh NSUI (Mz) President RB Lalmalsawma ten thu an sawi bawk.