Manipur buaina avanga an sahimna zawnga Mizorama tlan lut chu mi sing chuang an tling tawh a, Mizoram sorkarin a chhawmdawlna tur sum a dil chu pe thuai turin union home secretary an ngen.
Mizoram sorkarin Manipur raltlante chungchang sorkar laipuia thlen turin Minister Robert Romawia Royte chu New Delhi-ah a tir a, nimin khan Union Home Secretary Ajay Kumar Bhalla chu a pisaah a kawm a, Mizoram sorkarin raltlante enkawlna tur home ministry hnena sum a dil chu rang taka sanction turin a ngen a, sum hi pek chhuah vat a nih loh chuan thil tha lo zawk thleng thei a nih thute a hrilh.
Union home secretary chuan Mizoram chief minister rawtna a lo hriat tawh thu te, Manipur raltlante tanpui nan Mizoram sorkarah sum pek thuai a nih tur thu Mizoram minister hi a hrilh niin sorkar thuchhuahin a tar lang.
He an inkawmnaah hian Minister Robert-a chuan tun dinhmunah Mizoramah Manipur raltlan mi 11,328 an awm mek a, sorkar, NGO leh kohhranten a theih ang angin an buaipui a, central sorkar puihna an mamawh hle tih a sawi a. Manipur tual chhung buainain ziaawm lam a pan thei lo tih a chian thu te, sorkar laipui chu a tul anga a inrawlh zel a tul tak meuh tihte union home secretary chu a hrilh a ni.
Minister Robert-a chuan Assam Rifles insawn chungchang pawh a sawipui a. AR-ten tuna an awmna, AR Lammual chu a rang thei ang bera Mizoram sorkar kuta an hlan a tul thute union home secretary hnenah hian thlen bawkin, AR Lammual hmuna Laldenga Centre lungphum chu union home minister-in a lo phum tawh angin, a taka hna tan vat a ngai tiin NOC pe chhuak nghal turin a ngen a, union secretary chuan tihfel thuai an tum thu a lo hrilh bawk.
Tar lan tawh thin angin Chief Minister Zoramthanga chuan DO letter hmangin raltlan chhawmdawlna tur sum hi home ministry-ah a dil a, dilna a thlen hmasakah Rs. vaibelchhe 5 a dil a, raltlan an pun zel avangin Rs. vaibelchhe 10 pe zawk turin thu a thlen nawn leh a. State sorkarin sum a dil chungchang bawhzui tur hian Robert-a chu tirh niin Home Commissioner H.Lalengmawia’n a tawiawm a ni.
Mizoram sorkarin a chhinchhiah chinah nimin tlai dar 5 thleng khan Manipur atanga Mizorama tlan lut hi mi 11,503 an tling tawh a, heng zinga 8,634 chu relief camp-ah an awm mek.
Raltlan luh tamna, Kolasib district-ah mi 4,109 awmin Aizawl district-ah 3,825, Saitualah 2,809, Champhaiah 303, Mamitah 126, Khawzawlah 111, Lungleiah 83, Serchhipah 57, Lawngtlaiah 48, Siaha-ah 21 leh Hnahthialah 11 an awm.
Relief camp hi district pathumah a awm a, Kolasib district-a relief camp 14-ah 1,491 an awm a, Aizawl-ah relief camp 13-ah 637 awmin Saitualah relief camp pariatah 741 an awm a ni.