State Vector Borne Disease Control Programme (SVBDCP) chuan nimin khan Malaria do beihpui thla an hman mekah MJA member-te pualin Media Sensitization Workshop an buatsaih a, nikumah Malaria thih pui mi 10 an awm thu tarlan a ni.
Nimina Aizawl Press Club-a Media Workshop neiha SVBDCP hotute’n an tarlan danin, nikum khan Mizoram pumah Malaria vei hmuh chhuah mi 10,229 awmin, he natna thihpui mi 10 an awm.
Kumin Janaury atanga April thla chhungin Malaria vei hmuh chhuah mi 1,734 an awm tawh a, kuminah erawh nunna chan an la awm lo. Lunglei, Lawngtlai, Mamit leh Siaha District chu Mizorama malaria tmana district a ni.
Nikum chhung khan Mizoramah Dengue vei hmuh chhuah 1,868 awmin, mi pangain an thihpui a, kumin June thlengin sample endik 2,897 atangin vei hmuh chhuah 220 an awm a, thihpui erawh an la awm lo.
SVBDCP hotute chuan, Malaria natna hluar hun a thleng chho mek a, he natna laka inveng turin thosi pian theihna siam lo tura mahni in leh a vel a tui tlan theihna tifai thin a tul thu sawiin, mipuite chu thosi seh laka in venna hrang hrang thosi hlauh hal emaw, hnawih chi hmang turte, zan mutnaah leh ram riahnaah thosilen zar ngei turin an ngen a, khawsik reng reng chu a rang thei ang bera ASHA leh sub centre ah te exam tir thin turin an ngen a ni.