Aizawl : Mizoram University Vice Chancellor Prof Dibakar Chandra Deka leh Registrar Prof Lalnundanga ten nimin khan Raj Bhavan-ah Larsap Dr Hari Babu Kambhampati hmuin, NIRF ranking thar berah University 500 chuang zingah MZU chu 78-na a nih thu leh nikumah 76-na an nih thu sawiin, hma an sawn chu an lawm thu an sawi.
MZU VC leh Registrar chuan MZU hmasawnna tur hrang hrang Larsap chu sawipuiin, Medical College leh Law zirna siam theih dan kawng te leh rawtna awm te pawh an sawipui a. Larsap chuan MZU hotute rawtna te chu tha a tih thu sawiin, hemi chungchang hi Chief Minister sawipui se tha a tih thu leh Health Minister leh Law Minister te nen pawh inbe rawn se tha a tih thu a lo hrilh.
Larsap chuan Mizoram mipuiin central sorkar hnuaia scheme tha tak tak te leh bank loan hman tangkai chungchangte an la hre chiang lo a vei thu MZU hotute chu a lo hrilh a. Bank lam hotute chu vawi tam tak a sawipui tawh thu leh bank lam chuan tanpui tlak, tanpui mamawh leh loan rul thei tur chu puih an inhuam thu a sawi a. Hemi kawngah hian mipui zirtirna lam emaw bank hovin statistics an mamawh atana market survey kawngah te MZU zirlai leh research scholar te hman tangkai a rawt a ni.