Kum 34 mi, Pokhran Army base camp-a chawhmeh hralh thintu chu sipai hnenah lehkha pawimawh laa Pakistan ISI hnenah a hralh thin tih Delhi police-ten hre chhuakin an man.
Habeebur Rehman hi Rajasthan-a Bikaner district-a mi niin Thawhlehni khan Delhi Police crime branch team chuan an thu dawn bawhzuiin an man.
“Rehman chu he thilah hian a inhnamhnawih tih kan hria a. Finfiahna kan neih hnuah Pokhran-a a chenna inah manin kan dap nghal a. Document thuruk kan hmu chhuak a, Official Secrets Act hnuaiah case kan siamsak a ni,” tiin Special Commissioner of Police (Crime) Praveer Ranjan chuan thuthar lakhawmtute a kawmnaah a sawi.
An chhui zuinaah sipai pakhat, Paramjit-a chu a inhnamhnawih tih an hre chhuak a. Ani hi Pokhran-a a awm laiin thuruk eng emaw zat chu Rehman-a hnenah hian alo hlan tawh thin a ni.
Rehman hi Pokhran Army base camp-ah hian kum tlem kal ta atang khan contract hmuin chawhmeh a hralh thin tih Delhi police thuneituten an sawi.