Somalia khawpui, Mogadishu-a thihchilh bomb hmanga sipaite training-na hmun, military training camp beihnaah sipaia tang training lai mi 15 vel an thi.
Army officer Mohamed Adan chuan nimina thihchilh bomb tipuaktu hian training laite General Dhegobadan Military Camp tuala an intlar lai takin a tipuak niin a sawi.
“Sipai atana lak thar mi 15 an thi tih ka hre thei tawh,” tiin Adan hian a sawi a. Thi zat hi an la pung thei niin a sawi bawk.
Hliam tuar eng emaw zat an awm bawk a, heng mite hi Mogadishu-a Madina Hospital-ah dah luh an nih thu Reuters news agency chuan a tar lang.
Thihchilh bomb tipuaktu-ah hian eng pawl mah an la inchhal lo va, thla 18 liam ta chhunga an ram khawpuia beihna thleng lian ber a ni.
Somalia-ah hian Islamist hel pawl an tam hle a. Khualbuk leh venhim hna thawktuten mi an lo endikna hmun beihte phei chu thil thleng zing tak a ni.
December, 2019 khan an khawpui ber laili laia mi endikna hmunah bomb khat tlata phur car chu thihchilha tihpuah niin mi 81 zet an thi a. August, 2020 pawh khan khualbik pakhat chu firfiakten luhchilhin mi 11 zet an thi bawk.
Somalia ram hi kum 30 chhung zet chu ram buai a ni ta a, tual chhung buaina, hnam leh hnam intihbuaina, hel pawl, tam leh politics mumal lovin a tihbuai reng ram an ni.