A umtu zawk ni chungin Tuichangralin Durtlang North tan hnuhma chhia an hnutchhiah belh a, Ningani zan Tata SK 712 Pro Volleyball League-ah 3-2-in an hneh.
R Dengthuama Indoor Stadium, Mualpuiah Tuichangralin paukhauh takin an khel a, an mamawh hnehna changin 20-25, 25-23, 18-25, 26-24, 15-12-in an chak.
Lalhmunmawia (Mapuia) chuan point 22 hmuin tum nga a hloh a, Vinod Khatkar chuan vawi 25 vaw tlain point 11 a paih ve thung. League kal meka vawi thum an khelhah a tum khat nan Tuichangral an chak a, semifinal beiseina thar an insiam.
D3 Business Player of the Match-a thlan Anup D Costa chuan point 40 thawk chhuakin 11 a hloh a, chak beiseiawm takin set khatna leh thumna lakpui mah se mang chhiain Durtlang North a um zui zel.
Vawi li an khelh tawhah tlawm vekin tlak an hnaih a, kum kal taa Chhinga Veng Spikers-in sulhnu chhia an hnutchhiah, champion lai ni chhunga chak nei lo zawn rei ber an nih rual chiah a ni.
Inkhel pawimawh leh inhnehtawk taka inbeihnaah Tuichangralin set hnih an hloh avangin point hnih bak an hlawh chhuak zo bik lo va. Durtlang North nen point an insem avangin hmahruaitu TNT-in khelh hnih la nei chungin semifinal an luh phah a, team pahnih hian point kua an kawl mek an umpha thei tawh lo a ni.
Hunthar leh TNT hneh lova an tlawm zawn hnuah Tuichangralin rilru lama fiahna an hmachhawn a. An khelh hmasak bera hliam vanga lak chhuah Saidingpuia Sailo chuan tum 14 hlap tlain point 10 a hloh a, taksa lamah a inpeih tawk lo va, tum dang a pha lo.
Mahse, state pawn atanga an lak luh Vinod thlawp zovin Mapuia a che tha a, Tuichangral tan mi mala thawh hlawk ber ni khawpin a tangkai. Vanlalthlamuanpuia Sailo chuan point kua hmuin vawi hnih chiah a tisual a, setter Hmangaihthanga’n awmze neiin ball a sem a, team pum puiin hma an sawn.
Durtlang North-in championship kal mek inkhel vawi khata set hnih an lak hmasak ber a ni a, chak tlang thei mai turin rin hlawh hman. Mahse, Tuichangralin inthununna tha tak nen set lina bul an tan a, inelna sang hmachhawnin 19-19 a nih hnuah 24-24 thlengin an intluk chho zel.
Mipa league kal meka set nga an khelhna hmasa berah Tuichangral dingchangin, kar leh Thawhtanni zanah boruak thar hip chungin Chhinga Veng an khelhpui leh ang.
Durtlang North-in kar leh Thawhlehni zanah Tuipuiral hmachhawnin league an khar dawn a, chak pawh ni se semifinal luh theihna kawng a ping tawh hle.
Semi-final khel tur Kanan
Trophy pathum nena season khar tum Kananin Zirtawpni tlaiah 3-0-in Power Department Sporting Club an hneh a, Tata SK 712 Pro Volleyball League semifinal an lut.
R Dengthuama Indoor Stadium-ah Kanan player-ten inkhairual leh thawh hona tha tak an lantir a, 25-12, 25-20, 25-21-a an chak rualin league vawi thum an khelhah chak vekin set khat chiah an la hloh.
Fel fai taka inlan Lalramliani’n point 10 hmuin tum khat chiah a tisual a, D3 Business Player of the Match lawmman dawngin a kawppui Lalhriatpuiin point ruk hloh mahse vawi 13 a vaw tla ve thung a, harsa lovin Kananin set hnih an la zawn nghal.
Season kal mek Pro Division hmeichhe inelna pahnih awm tawhah Kanan an champion ve ve a, lungthu kim chunga kum khar tur leh a vawi khat nan Mizoram inelna sang bera champion tumin an bei mek a, an hmabaka awm Luangmual nen rin an hlawh.
Kai thar Luangmualin Kanan ang bawka league vawi thum an khelhah hnehna chang vekin semifinal an lut fel tawh a, June 22, Ningani tlai league kharnaah an intawng dawn a ni.
Pro Volleyball hmeichhe inelna hmasa ber 2017-ah Power an champion a. Club tinung zui lova kum nga vel thih hnuah tuai thar leh mahse team tinung thei player chhuak thar tha an kawl lo.
Vanglai pel leh chawlh tawh an koh kir zinga mi Dingi’n ngaiawh pha tawh lo hle mah se team innghahna ber a ni a, amah thlawp thei ber FP Lalduhkimi’n point riat a hmuh chanve a hloh.
Championship tihlutu ni mahse nihna sang nei Power dinhmun kha an chhawm nung tawh lo.Vawi thum an khelhah tlawm vekin a hniam pahnih zingah an tel a, June 19, Thawhtanni tlaiah Bethlehem Vengthlang nen an inkhel dawn a ni.