Brighton & Hove Albion chuan Germany midfielder Mahmoud Dahoud chu free transfer in July 1-ah an lalut dawn.
Kum 27 mi hian Borussia Dortmund a contract a neih a hmang zo dawn a, Seagulls hnenah hian kum li contract a ziak ang.
Season liamta a che tha tak Brighton hian tun nipuiah an squad tichak turin Brazil forward Joao Pedro chu Watford atangin an lalut tawh a. Liverpool midfielder James Milner pawh an la fel tawh.
Brighton manager Roberto de Zerbi chuan, “Kan tan player pawimawh a ni ngei ang tih ka ring. Mahmoud kan team a a tel tur hi ka phur a, Sassuolo a ka awmlai tawhin ka hnuaiah khel se ka ti tawh.” tiin a player thar tur chungchang hi a sawi.
Germany tana vawi hnih khel tawh Syria a piang Dahoud hian Dortmund tan vawi 141 a inkhel tawh a. Tun season liamta ah erawh dar hliam avangin match 10 bak a khel lo.
Kum 2014 khan Borussia Mönchengladbach-ah professional football a a match hmasa ber a khel a, a kum leh atang player pawimawh ni zuiin kum 2017 khan Dortmund in an lalut.
Brighton hian midfield-ah an rinrawlte tun nipuiah an chhuahtir a rinawm avangin midfielder dang pakhat lakluh leh an la tum mek.