Aizawl: Manipur Chief Minister N Biren Singh-a’n an state-a buaina a reh thuai theih nan leh mipuiten harsatna an tawh lohna tura hmalakpuiah Mizoram Chief Minister Zoramthanga a ngen.
Pathianni chhun dar 12:30 khan Chief Minister Zoramthanga chuan Manipur CM-in phone-a a biak thu hi a Twitter account-ah a tar lang a. Manipur CM chuan an tual chhunga tharum thawhna thleng mek a reh thuai theih nana boruak tha zawk siam turin Mizoram sorkar hotute leh sorkar laipuite nen hma lakho tul a tih thu a hrilh a, ani pawhin tha a tihpui thu a lo hrilh niin Zoramthanga’n a tweet.
Hei bakah hian Singh chuan Mizorama Meitei eng emaw zat awmte harsatna tawk loa an awm avangin lawm thu a hrilh thu leh Manipur boruak avanga Mizoramah chi leh chi inkar buaina a chhuah zui zel loha thlamuang taka an awm zel a beisei thu a hrilh niin Zoramthanga’n a tar lang.
CM Zoramthanga pawhin Mizorama Meitei awmte chu Mizo mipuite pawhin an lainat thu leh sorkar bakah NGO ten remna leh muanna a awm theih nan hma an lak reng avangin Mizorama cheng Meiteite tan Mizorama an awm chhung chuan hlauh tur an nei lo a, an tan hlauhthawn tur engmah a awm loh thu leh boruak tha zawk ken tlang zel tum a nih thu a hrilh a, Manipur-a boruak tha zawk a awm nge a duhsak thu a hrilh niin a tar lang bawk.