Mizorama lung in (jail) 10 zinga lian ber, Central Jail dinhmun a him lo a, tang awm thei zat bituk let thawk tang an awm a. Tang enkawltu (jail warder) indaih lohna hmunah hian tang tlan chhuak an awm fo a, tun hnaiah hnam dang mi pahnih tlan chhuak thar an awm belh.
Central Jail hi mi 438 tan theihna tura ruahman a nih laiin June 17, 2023 khan mipa tang 926 an awm a. Tang awm thei zat bituk aiin 488-in an tam a. Hetihlai hian jail warder erawh mi 18 vel chauh an awm niin The Zozam Times thudawnna chuan a sawi.
Tun hnaia Central Jail tlawha an chanchin zirchiangtu, The Zozam Times thudawn danin jail warder-te hi chhun leh zanah an in-duty chhawk a, chhunah mi pali, zanah mi pali tho an duty thin.
Jail inkaihhruaina danah chuan lung in vengtu mi pakhatin jail tang mi pasarih vel zel vil tura tih a nih laiin tun dinhmunah erawh thawktu indaih lohna avangin pakhatin mi 200 chuang vil thin ang a ni thung.
Tang vengtu indaih loh hlena hmun, Central Jail-a tang mek hnang dang mi pahnih chu Inrinni zing dar 3:45, khawvar hma khan an tlan chhuak a, hemi zan hian tang vengtu mi pali chauh awmin, mi 926 an veng a ni.
Thudawn danin Central Jail-a tang mek tlan chhuak tate hi Jiban Uddin (33) s/o LT Cherag Ali , Fatehpur, Assam leh Kamal Hossein (27) s/o Isab Ali bardowal, Tripura-te an ni a. Tui pipe bangah tungin jail bangah an lawn liam nia hriat a ni a. An pahnih hian ruihhlo kaihhnawiha man ve ve, an thubuai ngaihtuah lai mek a ni.
Zonuam Police hotuten The Zozam Times an hrilh danin Central Jail-a tang mek tlanchhuak an awm thu hi Inrinni zing dar 6:15 vel khan jail hotute hnen atangin report an dawng a, thubuai ziah luh nghal niin, tang tlanchhuakte hi ngawrh takin zawn mek an ni a, he thu buatsaih lai thleng hian man an la ni lo.
Mizorama jail lian ber, Central Jail hi a sakna a rei tawh a, tang awmna hmun inte hi a hlui tawhin a tha tawh lo hlawm hle a. Chei that ngai tawh tak a ni hlawm a ni.
Jail hmunhma tha tawh lo leh thawktute an indaih loh hle avang hian jail tang zingah hian tlan chhuak an awm belh mai hlauhthawnna a lian hle a. Jail-a thawk thin, tuna chawl ta mi pakhat chuan Central Jail chu sorkarin a ngaihtuah hle a ngai nia a hriat thu a sawi a, thawktu indaih lohna vangin jail tang thenkhatte phei chu duty-tir a nih thin thu a sawi.
Jail la tharlam deuh, Central Women Jail-ah pawh tang awm thei zat bituk aia tam fe tang an awm mek a. June 17, 2023-a tang awm mek zet chu mi 295 an ni.
Hmeichhe jail hi mi 96 tan theihna tura ruahman a ni a, hetihlai hian tuna tang mek erawh tang awm thei zat bituk let hnih vel an ni thung a. He jail-a awm mek zingah hian nu tel loa awm lo thei lo naupang buchip 10 bawr vel an awm bawk nia thudawn a ni.