Anurag Rawat chuan vawi 50 chuang vaw tlain Tuipuiral point hmuhpui mahse, Inrinni zan Tata SK 712 Pro Volleyball League-ah 3-2-in Hunthar an chak a, semifinal an lut.
R. Dengthuama Indoor Stadium, Mualpuiah Hunthar an che sual thui teuh hle a, awlsam taka set an lak hnuah an inthlahdul.
Tuipuiralin set hnih la zawnin an chhang let a, mipui beisei loh thil an thlentir. A kawtawp atangin team tha zawk Hunthar an kir leh hram a, 25-13, 26-28, 14-25, 25-18, 15-10-in an chak.
Set la lo leh el pha lova TNT an hneh loh rualin Tuipuiral spiker Anurag chuan hnual takin khelmual a chhuahsan. Hunthar hmaah erawh chungchuang takin a theihna a lantir a, point 54 ngawt hmuin 23 hloh mah se hnehna rim hre phakin Tuipuiral a chawi kang.
Pro Volleyball inkhel vawi khata point thawk chhuak tam ber a ni nghal a, set hnih a lakpui avangin kai thar Tuipuiralin a vawi khat nan point an hmu a, a team chakpui lova vawi thum a khelh tawhah a tum hnih nan D3 Business Player of the Match a ni thei.
Season kal mek inkhel vawi hnih awm tawhah Hunthar an chak ve ve a, Tuipuiral hmaah inkhel tir lam an thunun a, chiang takin set khatna an la.
Set la zawn thei turin an sang chho char char a, player thenkhat tan hun tha siamsakin Punjab atanga an lak luh Gagandeep Singh telin an thlak hlawm a, ngai an awh zui lo.
Tlang mai tura ngaih khawpa dinhmun tha an nih laiin Anurag chuan hmun awlah dahin Tuichangral a fuih phur a, an pawtthla. Delhi tlangval hi langsar in a team chakna ber a ni a, Hunthar inpumkhatna thiattu a ni.
Tlawm thei dinhmun derthawngah Hunthar tlu lut ve thungin, league kal meka point an hloh hmasak ber leh set hnih an hloh zawn vawi khat a ni a. A kawtawp atangin an inphuar khawm thar leh a, an khel thin dan lantir lehin tute pawh rin tlakin an inlan.
Hunthar setter Remsangzuala’n duhthlan tur a ngah a, tawn hriat nei tam Lalramnunfela leh Laldensanga’n an ball hmuh an chhawr tangkai. Tuipuiralin set ngana thlengin Anurag bak ball pek ngam an nei lo va, set lina tir lam atangin lehlam nih rual phak lovin a umtuah an tang tluan ta a ni.
Fela leh Zomuana’n point 10 chuang thawk chhuakin Rama leh Densanga’n point kua ve ve an hlawh a, 2017 leh 2018 champion Hunthar chakpui mahse inen fiahna tur leh zirlai pawimawh a ni tel. Pahnihnaah an insawh nghet a, June 21, Nilainin zanah hmahruaitu leh an elpui kumhlun TNT an khelhpui ang.
Chak zo lo chungin Tuipuiralin rahbi thar an tuk a, chak thei thinlung thar pu chungin June 20, Thawhlehni zanah khelh li an tlawm zawn avanga hnuhmu chhiain a tlakbuak mek Durtlang North an hmachhawn dawn a ni.
TNT la chak vek
Vanlaltanchhana leh Laldinchhunga’n Thutak Nunpuitu Team tanpuiin Zirtawpni zanah 3-1-in Chhinga Veng Spikers an hneh a, Tata SK 712 Pro Volleyball League hmahruaitu an nihna an sawhnghet.
R Dengthuama Indoor Stadium, Mualpuiah TNT-in chona tling inkhel an hmachhawn a, dinhmun harsaah Chhinga Veng aia insiam rem awlsam zawk an nihna chhawrin 25-20, 17-25, 25-22, 25-23-in an chak.
Kawnpui chhuanvawr Valbuanga’n point 22 hmuin a zawnin tum li D3 Business Player of the Match a ni a, Dinchhunga nen an thawh chhuah belh khawmin 40 a chuang a; league vawi li an khelh tawhah TNT an chak vek.
Tuichangral an hneh tuma Zosangzuala nena an awltir Tlangsam spiker Dinchhunga’n vawi 19 vaw tlain Valbuanga aia point khata hloh hnemin tum kua a tisual a; set thumna an lak theih nan a thawh hlawk a, a hnung atangin dik taka hlap thlak a nei nual.
Khelh hnih chak zawn chunga khel Chhinga Vengin set khatna laihawlah an insawrbingna an hloh a. TNT rinrawl Valbuanga’n chet harsat ve tho mahse Sadraka Fanai leh Dinchhunga’n team awi nungin, 20-16-a sang zawk an nih hnuah harsa lovin an tlang.
Set hnihnaah Chhinga Vengin inkhel an tidanglam ve thung a, chungnung taka inlan Javed Khan chuan lehlam banpharna chung atangin a hlap thla fo a, veikhawr Lalbiakmuana’n tha takin a thlawp bawk a, TNT talbuaiin an khing let zo lo.
Mahse TNT an hnungtawlh rei duh lo. Set thumna an tan rualin an insiam rem nghal. Harsa lova set thum la zawn thei turin TNT-in inkhel an thunun zui a. Chhinga Veng intuai thar ve lehin hun pawimawhah point nga an hmu zawn a, an nih rual leh hman. 23-23 a nih leh hnu boruak sangah Valbuanga’n vaw tlain Spikers-in chhang let ve leh nghal tura hun ṭha an bawhpelh a, Zosangzuala’n deuce ngai lovin TNT chakna point hlu tak a thawk chhuak.
Chhinga Veng tan semifinal beiseina a bo chuang lo va, khelh hnih an la neihah vawi khat an chak chuan an tlang dawn chiang a, June 19, Thawhtanni zanah Tuichangral nen an inhmachhawn leh ang.
Semifinal lut chiang sa tawh TNT-in chak fai vek tumin June 21, Nilaini zanah league an khel zo dawn a. An elpui kumhlun Hunthar nen intawngin Mizo hlanga champion hmasa ber nih an tumna kawngah fiahna a ni tel nghal ang.