Manipur-a chi leh chi intihbuaina kal zela Meitei pawl pakhatin Mizoram sorkar vaua pawikhawih an tum thu an puan hnuah Silchar Mizoram House-ah venhimna khauh lehzuala kalpui a ni.
Silchar Mizoram House Deputy Resident Commissioner (DRC) S. Kaptluanga chuan Inrinni khan thupek chhuahin, “Mizoram House chhunga lut turte reng reng chuan duty-te hnenah tunge an ni tih finfiahna chiang tak an entir tur a ni,” a ti.
Duty officer leh Assistant Resident Commissioner lungawina tura mahni nihna tihchianna neite chauh Silchar Mizoram House chhungah luh phal a ni dawn a. He thupek hi hman nghal a ni a, thu leh awm hma atan chuan kalpui tur a ni bawk.
Tar lan tawh thin angin Silchar-a hmunpui nei Meitei pawl pakhat, All Assam Manipuri Youth Association (AAMYA) chuan June 14, 2023 khan chanchinbumite kawmin Mizoram leh rorel lai party, MNF chu vauin Manipur tlangrama chengten a hranga inrelbawlna an neih an thlawp avangin Mizoram tana pawikhawih an tum thu an sawi a. June 14 aţanga chhut a ni thum chhungin MNF-te hian an thu hi an sut leh tur a ni tiin an sut loh chuan Mizoram tan a pawi hle dawn niin an sawi a ni.
Hetihlai hian Silchar Mizoram House tual vel hi tui lianin a chim nasat avangin Inrinni atang vek khan mikhual thlen theih a nih loh thu DRC hian thuchhuah a siam bawk.