Mizoram inthlanpui kum 2023 june thla chanve kan thleng ta reng mai. Kum tawp lam November thlaah emaw kan inthlan a rinawm. Party lian tia sawi pathum MNF, Congress leh ZPM chuan chak ber nihna an inchuh dawn a. Kumdangah kha chuan opposition leh ruling ang deuh khan thil a kal thin a. Tun kum erawh chu a dang deuh dawn.
Kumdang ang lo takin june thlaah pawh a boruak a sâng ru riau mai. Kan ram social media pawh inthlan lamin a luah tam hle. Kohhran lamin biakina an aupui ber pakhat chu sawrkar tha neih an duh thu a ni a. Social media lamah pawh sawrkar tha neih hi thupui a ni. Kan ram mamawh ber leh kan duh ber pawh sawrkar tha, eirukna laka fihlim a ni a. Hemi nei tur hian inthlanna neih hma a tan lâk a, inthlanna a sum sen tlem tih pawh a ri tam.
Amaherawh chu inthlanna a sum sen ti tlem zawngin kan politician thenkhat an hawi tlat lo hi a buaithlak ber lai chu a ni. Kumthar tirah khan ruling party president chuan Hnam runah thu sawiin an party chuan sum lamah harsatna an neih loh tur thu leh opposition lam tan beih an khirh turzia kha a sawi chiam mai a. Sum leh paia inbeih ralah chuan an khirh hle ang tih pawh a rin theih nghal a. He a thusawi nemnghehna ni awm takin Mamit district a Hachhek biala ding tura Pu Robert Romawia Royte a puan ni chuan mi sang têl teh meuhin ruai an kil nghal a. A candidate chuan pawisa a mipui hneh ngei tum tih hriat takin Zawlnuam college a lut tur admission fee nei lote a tum sak tur thu a puang nghal bawk.
He an thusawi leh chet dan hian mipui chu min lei fai vek mai an tum tih a chiang hle. Sawrkar kal lai mêk leh sawrkar pawisa pawh duh tawka rut thei te an ni bawk. Hetiang chet dan hian mi tam tak a ti lunghnur hle a. Mipui min lei ang a, sawrkarna an chan leh hunah mipui pawisa bawk chu an rut leh mai dawn tih pawh a lang chiang viau.
Sum hmanga mipui lei tumna hrim hrim hi a lungawithlak loh takzet a. Mihring lei theih chu Sal leh nawhchizuar te hi an ni thin. Sum hmanga mipui lei tum hian sal leh nawhchizuar tluk lekin min hmu tihna a ni a. Min hmuh dan hrim hrim pawh hi ngaihtuah chian chuan a thinurthlak tak zet. Kan thlan turin hetianga mipui min hmu hi a rilru a hrisel lo tak zet a ni tih pawh hriat a ngai a. Bible nena sawi rem theih miah loh thil titu hian inthiam lova politics bansan hial khawpa mipui kan chet ve a ngai ta a ni.