Sudan khawpui, Khartoum-ah thlawhna atanga kahna avangin naupang panga telin mi 17 an thi tih thuneituten an sawi.
Inrinnia mihring chen tamna lai, Yarmouk district-a thil thlengah hian chenna in 25 a chhe bawk.
Hemi hma ni lawkah hian army lawk chuan paramilitary Rapid Support Forces lakah na zawkin beihpui an thlak dawn tih a sawi a ni.
Sudanese army leh RSF inkara indona hi April thla laihawl atanga chhuak niin an rama sipai rorelna awm meka thuneihna insem zel dan tura inmil lohna awm vang a ni.
June thla tir khan RSF chu an khawpuia ralthuam siamna hmun awmna, Yarmouk hi a pumin an thunun tawh tih an puang a ni.
Inrinni chawhnuah khan Pathianni zing dar 6:00 (India-a zing dar 9:30) atanga tan turin darkar 72 awh inkahhai puan tan a ni a. Hei hi Saudi leh US palaite puan a ni a. Hetiang inkahhai hi a hma pawhin puan a ni tawh a; mahse, inkahna a reh phah lutuk lo.
Indona chhuak mekah thi zat hi hriat a harsa hle a, mi 1,000 erawh an tlin ngei tawh rin a ni a, an zingah hian civil mi pawh tam tak tel tura ngaih a ni.
Indona avang hian mi maktaduai 2.2 vel zet chu an ram chhung hmun hrang hrangah an tlan darh a, mi nuai nga vel chu an thenawmah an tlanchhe bawk niin UN chuan a sawi.
Mipuite insaseng theih nan inkahhai puan a ni fo tawh a; mahse, a taka zawm erawh a hlawh ngai lem lo thung.
Tun hnai maiah pawh Mayo, Yarmouk, leh Mandela velah civil mite bitum an nih thu RSF chuan an sawi a. Army erawh chuan hemi chungchangah engmah sawi an nei ve lo.
Indona a chhuah atang khan mi sang tam takin ramri kânin an thenawm, Chad an pan.
Doctor leh damdawi in an indaih lo va, hliam enkawlna leh hmunhma pawh an inchan lo nasa hle bawk.
Tun tuma tharum thawhna thleng thar leh mek hi kum 20 zet an lo buai tawhna, Sudan chhim lam, Darfur region-a buaina anga chan mek a ni.