Ni thum liam ta chhungin khaw lum lutuk avangin Uttar Pradesh-a Ballia district-ah mi 54 an thi tawh a, district damdawi inah mi 400 vel dah luh an ni bawk.
Doctor-te chuan an thih chhan hi chi hrang hrang a nih thu leh a bulpui ber chu khaw lum lutuk vang a ni hlawm thu an sawi a. Khua a lum zel avangin damdawi ina lut an pung zel tih an sawi bawk.
Khaw lum uchuak tak hian Uttar Pradesh pum tuam mekin hmun tam takah chuan 40°C a kai hial a ni.
Damdawi ina dah luh ngai leh thite hi khawsik, thawk harsa leh chi dang dang an ni hlawm a. An pun thut avangin thawktute pawh an indaih lo hle.
Ningani khan damlo 23 an thi a, a tukah mi 20 thi lehin Inrinni khan mi 11 an thi niin District Hospital Ballia-a Medical Superintendent SK Yadav chuan a sawi.
Dr BP Tiwari, Additional Health Director, Azamgarh Circle chuan Lucknow atangin team tirh niin natna hriat chhuah mai loh dang a awm em ni ang tih an chhui tih a sawi a. A lum lutuk emaw, a vawh lutuk emaw hian thawk lama harsatna nei, zunthlum leh thisen sangte tan a hlauhawm thin tih a sawi a. Khua a lum zual deuh avanga thi an ni thei tih a sawi bawk.
District damdawi inah hian mi an pun thut avangin hlang pawhin a daih lo va, tam tak chu an chhungte leh thawktuten kaihkuahin emergency ward an panpui a. Additional Health Director chuan a ruala mi 10-in an pan chuan an buai nghal a, hlang an indaih lo nghal tih a sawi.
Uttar Pradesh Health Minister Brajesh Pathak chuan Ballia-a thil thleng hi an ngaihvenin an ngai pawimawh hle tih a sawi a, a mi mal tak pawhin a vil reng tih a sawi.
“Doctor senior pahnih, director level tirh tawh an ni a. Anni hian thil awm dan pawh an lo thlen thuai a beiseiawm,” a ti a. Chief Medical Superintendent Dr Diwakar Singh pawh a hna atanga chawlh lailawktir a nih thu a sawi a, ‘khaw lum avanga thihna thlengah fimkhur lo taka a chet avang leh inhriattirna mumal a pe lo’ niin a sawi.
“Heng lai hmuna Chief Medical Officer zawng zawngte chu damlo tinte uluk taka vila an mamawh ang damdawi pe zel tura tih an ni a. Damdawi hi sorkar damdwi in tinah a awm a, pawn lamah lei ngai a awm lo,” a ti.
CMS atanga chawlhtir tak, Dr Singh chuan Zirtawpni khan khaw lum avanga mi 34 an thih thu a sawi a. “Thite hi kum upa leh natna benvawn nei lai an ni a. Khua a lum avang hian an natna neihte zualin damdawi in an pan a, enkawl an nih laiin an thi a. Damdawi leh enkawlna an dawng hman vek a ni,” a ti.