- Mahmuaka Chhakchhuak
Vanram fâng ti a sawi tur hi an awm ta nual mai a, kan nu leh pate hunlai kha chuan an sawi thin pawh ka hre ngai lem lo, tun hnu hian khawilai hmun hmunah emaw hian Vanram fâng hi an lo awm leh nawlh mai thin a.
Vanram hi fân theih tura buatsaih a ni tawh nget tun hnu ah hian fân nachang kan hre ta chauh zawk pawh kei ka hrethiam ta chiah lo e a.
Vanram fân dan an han sawi hian a ngaihnawm thei hle zel mai a, a thente chuan lehkhabu an siam phah bawk a, Mizo Kristian, Vanram ngai leh thlen hlan nghakhlel tak takte hi chuan kan lo tui pui viau zel thin mai bawk a, Kan Biakinah thusawi turin kan ruai a, kan Hallelui tuar tuar thin a nih hi. A va ropui thin tak em.
Chutianga Vanram fângte chu mi special takah kan ngai a, an tawngkam chhuak apiangte chu Pathian Aw ang thaw thangin kan dah sak a, kan lak puithu sak em em mai zel a, kohhran ngei pawhin kan hlimpui phah ta hial thin. Nimahsela, Vanram hi a fan theih reng reng em ni? Pathian hian vanram hi fân a remti em ni ang le?
Ringtute tana a buatsaih hmun hi lo han en lawk a, lo han fân hmasak hi a remti reng reng em nit Kohhran, leia awmte tan hian kan nghahhlelh em em hmun hi lo hmuh lawk a remti em nit tih zawhna chi hrang hrang a awm thei ang. Heng zawhna chi hrang hrangte hi a chhanna chu ‘THEIH LOH’ tih a ni. Pathian hian a hmun buatsaih hi lo han hmuh lawk a, lo fan hmasak a remti lo a ni.
A nih leh engvanginnge a phalloh? Chanchintha Johana ziak 14;2 – 3 thu kan chhiar chuan ‘in tan hmun siamin ka kal dawn hi. Tin, in tan hmun ka han siam chuan ka lo kir leh ang a, ka hnenah ka la ang che u; ka awmnaah nangni pawh in awm theih nan ‘tih thu kan hmu a, helai thua ‘hmun’ a tih hi Greek tawng chuan ‘topos’ tih a ni a, chu chu KJV chuan ‘place’ tiin hmun 73 ah a sawi a. Chu hmun chu amah ring tute tana a buatsaih a ni. Chu hmun chu khawlai hmun ah nge tih erawh chu hriat phak a niloin hriat theih a ni lo thung.
Tirhkoh Paula khan TT. 14;19,20 thu kan chhiar chuan Lungin an denghlum a, a hnu reilote ah chuan zirtir te’n an kil laiin a rawn harh leh ta mai a, chu a thih (thi anga a awm) lai chuan II Kor. 2;2 thua kan hmuh angin ‘Van thumnaah’ lak chhoha a awm thu kan hmu ta a ni. Helaia Lunga an den hlumna hmun hi Lustra khua a ni a, Paula chu Pathianthu a hrilh laiin Juda thenkhat, Paula khaw tlawh tawhna khua, a rawngbawl tawhna khua a lungawi lo ho chuan mipui fuihpawrhin lungin an rawn deng ta chiam mai a ni.
Tichuan, Paula chu thi angin an kalsan a, a ruang chu khua ata daiah an hnukchhuak a, an kalsan ta a ni. Chu chu 46 – 48 AD inkara Paula zin vawikhatna hunah khan a ni.
Van thumna tih hi Juda ho chuan Boruak, Ni leh Arsite awmna piah ah, hmun biru deuh takah awmin an ngai. Apostolte hunlaiah pawh khan Van thumna hi hetiang hian ngaihdan chi thum lai awm angin Albert Barnes chuan a sawi a; –
- Van, Boruak leh Chhumte awm na, Arsi awmna thlengin
- Ni leh Thla leh Arsite awmna hmun
- Arsite awmna piah, Pathian chenna, a vantirhkohte leh thlarau thianghlimte nena an chenna hmun.
Heng bakah hian Scofield chuan hetiang hian a sawi ve bawk a; – Van khatna chu Chhum awmna hmun Van hnihna chu Arsite awmna hmun Van thumna chu Pathian chenna hmun….. tiin
Engpawhnisela, mithiam te’n Vanthumna an sawi hi a in ang vek lem lo a, hrilhfiah dan hrang hrang a awm tih erawh kan hriat a tha awm e. Tichuan, Paula, Pathian rawngbawl tu ropui tak chu Van thumna meuhah lak chhohin a awm a, nimahsela, chuti chung pawh chuan a rawngbawlna hmunah leh a lehkha thawnna reng rengah te hian Van thumna awmdan leh a hmuh dan kan hmu tlat lo mai a ni. Engvang nge ni angt A chhan chu Pathian hian a hmun buatsaih hi a hun hma chuan hmuh leh fán a rem tih loh vang a ni.
46 – 48 AD inkara a rawngbawlna hmun Lustra khuaa an denhlum hnuah khan rawngbawlna hmun tam takah a nei a, Thuthlung Thara ziak hmasak ber Chanchin tha Marka ziak pawh hi he mi hnua ziak hi a ni a, chu pawh a ziaktu Marka hian Paula rawngbawlna atanga a hmuh leh a hriatte atangin a ziak chauh a ni. Paula hian Marka hi a zin hmasak ber chuan a hruai a, chutih lai chuan Marka chu ala naupang ang reng hle mai a, Khaw pathum, Salamis, Paphos leh Perga khuate an tlawh chuan hmalama an kal zel dan tur leh hmabakah chuan harsatna tam tak awm theite an tawng dawn tih an hriat chuan John Marka chuan a huphurhin a zãm deuh ta mai a, a ni hi a nu fapa neih chhun leh duat no a ni a, a lung leng em em mai bawk a, chuvang chuan Perga hmun atang chuan Paula leh Barnabate chu zui zel a zuam ta lo a, hnunglamah a letsan ta a ni. Tichuan Paula leh Barnabate chuan rawngbawlna an nei zel a, thilmak tam tak an ti a, an thawmhnaw ringawtte pawh dam phahna atana hmang an awm a, Ramhuaizawl an tih dam dante pawh kan hmu bawk a, Nazarit dan anga a sam tan thute thlengin kan hmu a, chutihlaiin amah ngei pawhin ‘kan thil hmuh leh hriatte hi sawi loin kan awm thei lo a ni’ a ti bawk a, eng vanga a hmuh leh hriat chu sawi loin a awm ngawt ang ni?
Thuthlung Thar rawngbawlna bul tan tu a ni a, hmun tam tak ah kohhran a phun bawk a, kohhran tan a nun zawng zawng a hmang a, engvangin nge zep a neih ngawt angt Zep tur a awm loh vang a ni. Tin, amah ngei pawhin a thih dawn darkarah ngei pawh Timothea hnenah ‘ka chhuah hun a thleng tawh e, Intihsiakna tha chu ka bei zo tawh a, ka tlansiakna kawng ka hlen tawh a, rinna chu ka vawng reng tawh a ni. tunah chuan Felna lallukhum chu ka tan dahin a awm tawh a….’ tiin a sawi mawlh mawlh a, a thlenna hmun tur Vanram nawm tur zia leh mawi zia te chu a thih dawn hnaihah tal chuan sawi ve awm tak a ni a, nimahsela a sawi si lo.
Kohhran tan rawngbawlna nasa takin nei mahsela, kan tana hmun buatsaih Vanram chu a zep tlat ang a, min hrilh duh lo em ni ni ang let Engvangin nge hmun buatsaih chu hmu reng sia a sawi si loh ang let Kan Zorama in ti Ringtu tha em em thenkhatte ang hi chu nisela chuan sawi tur a ngah ngawt ve ang le…..