Kenneth Kaunda, Zambia president hmasaber, African ram hruaitu, Britain laka zalenna sual chhuaktu zinga dam rei ber chu kum 97 mi niin a thi.
Thawhtanni khan Kaunda hi pneumonia vangin an khawpui, Lusaka-a sipai damdawi inah dah luh a ni a. A lam hnaihte chuan Covid-19 a vei lo niin an sawi.
Kum 1950 khan khatih hunlaia Northern Rhodesia-in Britain ram atanga zalenna an sual tan kuma mi pawimawh ber zingah a tel.
Zalenna an sual chhuah hnu, kum 1964-ah president hmasa ber a ni ta a ni.
United National Independence Party (UNIP) hruaitupa a nih angin an ram hi kum tam tak chhung one-party rule hnuaiah a enkawl a. Kum 1991-a multi-party election-a a tlak hnuah a chawl chauh.
A fapa, Kambarage chuan a pa facebook page-ah a thih thu a tar lang.
Zambian President Edgar Lungu pawhin African rohlu an chân vangin ram pumin an sûn tiin a sawi a.
Sorkar chuan sûnna hun atan kar thum hun an dah a, hetih hunlai hian intihhlimna leh sahawkna thil reng reng buatsaih an khap.
Nelson Mandela Foundation pawhin an ram zalenna sual chhuak leh vun rawng inthliarna tireh tura a beihnate khawvelin a hriat reng tur thu a tar lang bawk.
President atanga a bân hnu hian Africa khawmualpuiin HIV/AIDS a dona kawnga nasa takin hma a la chhunzawm leh a. Mahatma Gandhi-a kalphung ang zulzuiin buaina chhuak lo tur ang zawng hlirin rorelna a kalpui thin.