- Ruata
Kia India chu thlaleh thla laihawl velah Seltos thar, hmel thar nena tichhuak turin an inbuatsaih mek a, a vawikhat nan Andhra Pradesh-a an Kia ho hmunpuia mi thlalak chu a rawn darh a ni.
Seltos thar hian lirthei leitute pawh a hip viau a beiseiawm a. Seltos elpui segment ho Maruti Suzuki Grand Vitara, Toyota Hyryder te bakah Honda Elevate leh Citoren C3 Aircross lo awm tur a elna kawngah pawh nasa takin a puih beisei a ni a. A elpuia market lama hmahruaitu – Hyundai Creta pawh hi kum 2024 tir lamah a thar a rawn chhuah beisei a ni a, 2023 Kia Seltos facelift thar hi design tihchangtlun deuh leh advanced technology tam tak nen a rawn a rawn chhuah hmel a, a khawl lam erawh a danglam loh hmel a ni.
Tun hnaia a thlalak darh mek, maroon rawng a ni a, a man to ber GT Line variant-ah hei hi a awm dawn thung a ni. SUV hian grille thar a nei a, headlamp thar leh LED DRL thar leh bumper thar a nei bawk. ‘Ice Cube’ LED fog lamp assembly leh alloy wheel te hi tuna chhuaka mi ang hi a la nih hmel a. Seltos thar hian hmalam leh hnung lamah LED strip a nei a. Kawngkhar chunga cladding chu a chhuak mek nena khaikhinin a danglam hret hmel a. A hnung lamah chuan tailamps design thar a awm hmel a. GT Line trim hian red inserts an tih, rawng sena chei a ni dawn a, dual exhaust tip a awm dawn bawk a ni.
Kum 2023 Kia Seltos facelift thar turah hian feature upgrade lian tak pahnih a awm dawn a hetah hian – panoramic sunroof leh ADAS (advanced driver assistance system) tech a awm dawn a ni. Hemi hnuaiah hian himna hmanraw hrang hrang – blind spot collision warning, forward collision avoidance assist, intelligent speed limit assist, smart cruise control with stop and go, highway driving assist, safe exit warning leh rear cross traffic collision avoidance assist te a awm dawn a ni. Seltos thar hian ambient lighting system a nei ang a, interior theme thar a nei thei dawn a ni.
A khawl lamah chuan 2023 Kia Seltos facelift thar hi 1.4L turbo petrol khawl aiah 1.5L turbo petrol engine nen a rawn chhuak dawn ni a sawi te a awm a, hei erawh hi chu company lamin an rawn la puang chiang ang a. 1.5L petrol hian 160bhp power leh 253Nm torque a pechhuak thei a. 6-speed manual emaw 7-speed DCT gearbox emaw a nei dawn a. Tuna 1.5L naturally aspirated petrol (115bhp/144Nm) leh 1.5L diesel (116bhp/250Nm) te pawh hi a la awm zel hmel a ni.
Kia Seltos hi tunhnaiah Mizoramah pawh a tam chak hle a. Kia hi dealership mumal tak nen Mizoramah pawh an inbun tawh avangin an lirthei mawi tak tak te hi a pung chho viau a. India ram huap pawhin SUV huangah Kia hi a thang chak hle a, Seltos thar lo chhuak tur pawh hian nasa takin market lamah a rawn puih beisei a ni a. A chanchin kan han tarlan tak aia chiang leh fiah zawkin kan hre thuai dawn niin a lang a ni.