Hri leng nasa taka tuar chungin Mizoramah buh thar a pung nia sawi a ni a, hmasawnna leh thu hriat atana hlimawm ni bawk, malsawmna nasa tak a ni.
Ram economy tluchhe mai tur anga kan ngaih lai leh tho chhuak leh tur kan awm lo mai ang tih hial khawpa mi thiamte an mangan tawh laia, hri leng kara hetiang thu hriat hi a nuam a, kuthnathawktute pawimawhzia hriain sorkar pawhin an tana ruahmanna nasa zawk a siam chhoh thiam zel pawh a tul awm e.
Agriculture minister chuan kum hmasa lamah daih tawh khan kum khata vawi hnih buh thar a nih theih nana hma an lak thute sawiin, an hmalakna hian rah tha chhuah chho zel niin a lang a, kuthnathawktute hi kan ram economy siamtu pakhat an ni tih hriain anmahni tihhmasawnna tura ke pen pui thiam pawh an ngai hle a ni.
Tin, tun sorkar kan hrawn mek hian minister thenkhat anmahni chan hneh taka enkawl thei an nei nual mai a, hei hi a lawmawm hle bawkin a hriat. Mipui rilru pawh hi a tha zawngin kalpui chho deuh deuh se la, a thlenna tur dik takah hmasawnna hi thlentirin, vil zui peih bawk se la, phurna pawh a awm chho zel bawkin a rinawm.
Minister hian, “Luipui bula leiletah thal lai pawha tui pump luh a nih theih nan ruahmanna kalpui mek a ni a, chumi anga kan ti thei a nih chuan kum khatah buh vawi hnih thar chhuah theih kan tum,” a ti a, hri leng karah leh ramri boruak hrehawm kan tawn mek karah hlawhtlinna awm chho zel thei se thil duhawm tak a ni bawk a ni. Kuthnathawktute pawh hi an sawi ang ngei hian ngaihtuah chho zel mawlh teh se.